Tirkîye de vizêr dema newî yê wendişî destpa kerd. Mektebê rejîma tirk ke tenya bi jew ziwanî perwerde danê açarnîyayê qerargehê asîmîlasyonî. Sîstema Tirkîye ke perwerdeyê pirziwanî red kena kêberanê mektebanê xo seba dema newî yê asîmîlasyonî akerd.
Qezaya Şirnex Cizîr ke dewlet 79 rojan êrişê cenî, doman, kal-pîr û gencan kerd û qirkerdişan viraşt de zî malbatî nêwazenê domananê xo bieşrawê mektebanê asîmîlasyonî. Dayika bi nameyê Amîne Beyter aşkere kerd ke iyê dê domananê xo nêrişnê mektebê ke nîme qereqol, nîme mektebî yê û da zonayen ke iyê dê domananê xo bieşrawê Mektebê Sereteyî yê Bêrîvan ke perwerdeyê bi kurdî dana.
Dewlet kurdan çinî hesibnena
Beyter da zonayen ke hurdî domanê ayî şîyayişê mektebê kurdî ra bi şa yê û wina dewam kerd: “Domanê ma şîbî mektebanê kurdî, la rîwalê qedexeyan nîme de mend. Domanê mi mektebê kurdî ra zaf hes kenê. Keynaya mi zaf serkewteyî bî. Lajê mi û keynaya mi şîbî kursê kurdî û kêfweş bî. Mamosteyê înan seba avey şîyayişê domanan xêlê hewl day. Wexto ke ma mektebanê tirkî de tewrê kombîyayişanê malbatê domanan bî, rîwalo ke ma tirkî fehm nêkerd ma xêlê zehmetî antî. Zey kerr û lalan ma kombîyayişan de vindîyay. Zerya ma mektebanê kurdî wazena.”
Amîne Beyter hayr ant wezîfe ra girotişê malimanê Egîtîm Senî ser û persa ‘ma dê domananê xo emanetê kê bikerê?’ kerd. Beyter va, yeno vaten ke dê polîsan bigîrê kar, na jû ma vistnena tersî û aşkere kerd ke dewlet kurdan her tim çinî hesibnena.
‘Ma nêwazenê şirê mektebanê tirkî’
Merve Beyter a 10 serre ke di serrî Mektebê Sereteyî yê Bêrîvan de wend dîyar kerd ke rîwalê qedexeyî mektebê înan yê ke bi kurdî perwerde day amey girotiş. Merve ard ziwan ke wexto ke ê şinê mektebê tirkî qiseykerdişê bi tirkî ser înan de ferz kenê û da zonayen ke wexto ke ala tirkan mektebî de vînena zî tersena. Şîrîn Beyter a 8 serre zî aşkere kerd ke a wazena şiro mektebê kurdî û nêwazena şiro mektebê tirkî.
ŞIRNEX / DÎHA