Çalakîyê grevê vêşanîye û rojeyê mergî ke vera tecrîdî de dîyabi dest pêkerdene, dewam kenî. Çalakîyî êdî merhaleyêkê tehlukeyin de yî. Çalakwanan ra Metîn Serhato hepsîyî wina va: “Merdim bi xoverdayîşî beno rind. Seke bêmergan zî vato xoverdayîş cuye yo.”
Vera tecrîdê serê Rayberê Şarê Kurdî Abdullah Ocalanî de çalakîyê grevê vêşanîye dewam kenî. Çalakîya Leyla Guvene roja 192. de, çalakîya Nasir Yagizî roja 179, çalakîya hepsîyanê zîndanan 154, ya Îmam Şîş û 14 xoverdakaranê Strasbourgî roja 153, ya Yûsûf Îbayî roja 127 û ya Fadîle Toke 119 de dewam kena.
Hepsîyê ke grevê vêşanîye de bî, înan ra 2 grûbê ke 30 kesan ra pê yenî, çalakîya xo açarna rojeyê mergî. Çalakîya rojeyê mergî ya grûba yewine roja 19. de dewam kena. Çalakîya Parlamenteranê HDPyî Tayyîp Temel, Muras Sarisaç û Dersîm Dage zî dewam kena.
Xoverdayoxanê Zîndanî Metîn Serhato ke 16ê Kanûn a 2018î ra vera tecrîdê sere Rayberê Şarê Kurdî Abdullah Ocalanî de grevê vêşanîye de yo pêvînayîşê keyeyê xo de mesajê serkewtişî da û bale ante xoverdayîşê dayîkan ser. Metîn Serhato ke 153 rojî yo Zîndanê Xarpêtî de grevê vêşanîye yê bêdem-bêagêrayîşî de yo, gama ke keyeyê xo dir pêvînayîş kerdêne mesajêk şawit.
Bê xoverdayîş cuye nêbeno
Serhatî mesajê xo de qala xoverdayîşê dayîkan kerdo û wina vato: “Ma her tim dayîkan rê deyndar ê. Rixmê heme hêrişan dayîkê ma bîyî vengê ma û bawerîya ma yê serkewtişî gird kerda. Wa ciwanî wayîrê xoverdayîşê dayîkan bivejîyê. Eke şima ma meraq kene, moralê ma baş o. Seke şima zî zanê 6 aşmî yo xoverdayîşêko gird esto. Cayo ke xoverdayîş esto de coş û moral esto. Bê xoverdayîş cuye nêbeno. Merdim bi xoverdayîşî beno rind. Seke bêmergan zî vato xoverdayîş cuye yo. Ma bi bawerîya serkewtişî xoverdayîşî xurt kenê. Soz û amancê ma o yo ke ma do bi Merdimo Azad bêrî têhet. Hetê fizîkî de ma bêhal ê, rewşa weşîya ma hol nêya la ma biqerar ê. Heta hela peyêne ma do xover bidê. Azadîye sebebê estbîyayîşî ya. Pêvînayîşê 2ê Gulane yewe game bi la tecrîd hema nêameyo wedarnayene. Heta ke waştişê ma nêrî ca xoverdayîşê ma do dewam bikero. Xoverdayîş do tecrîdî wedarno.”
Ma bi kulturê xoverdayîşî pîl bîyî
Bîlal Ozgezero ke zîndan de dest bi grevê vêşanîye kerd û dima ra tehlîye bi, xoverdayîşê xo keye de domneno. Ozgezer 3ê Adare de dest bi grev kerdbi û 77 rojî yo ke grev de yo. Ozgezerî da zanayene ke ê şertanê şerî de ameyî dinya û bi kulturê xoverdayîşî bîyî pîl. Ozgezerî bale ant xoverdayîşê Leyla Guvene ser û wina va: “No xoverdayîş her roje hîna zaf beno pîl. Ma zî waşt mîyanê prosesî de ca bigîrî. Sey heqê her kesî, heqê Ocalanî zî estî. Ocalan rayberê şaran o. Tena rayberê kurdan nê, rayberê şaranê Rojhelatê Mîyanênî yo. Tena Rayberîye eşkeno krîzo ke heme dinya de xo nîşan dano, derbaz bikero. Şîyayîşê avûkatan yê Îmrali, seba ma kêfweşî yo. Labelê no nîno aye mana ke tecrîd wedarîyayo. Çimkî heqê qanûno bingeyî hîn estî. Ganî ê zî bêrî raştkerdene.”
AMED