Hêzê dewleta tirk nê demê peyênan de tarzêko newe yê qetilkerdişî vistî dewre. No zî bi wesayîtanê zirxinan qetilkerdişê merdiman o. Emser netîceyê qetlîyamê ke bi wesayîtanê zirxinan de ameyî kerdiş de 6ê ci domanî pêro pîya 12 kurdî ameyî qetilkerdiş û zaf kesî zî birîndar bîyî. Babete ser o Hetkara Serekê Pêroyî ya Komeleya Heqê Merdiman Avûkate Gulseren Yolerîye qisey kerde.
Ez bîya şahidê terorê wesayîtanê zirxinan
Yolerîye qiseykerdişê xo de qetlîyamê ke bi wesayîtanê zirxinan yenî kerdiş, şeklêko newe yê qetlîyamê ke bi ‘Toroso Sipî’ ameyêne kerdiş girewte dest û va: “AKPyî qetlîyam û îşkenceyan reyna kerd parçeyê cuye.” Yolerîye dewamê qiseykerdişê xo de va ‘ez wexto ke Xoverdayîşê Xoserîye estbî ez şîya Kurdistan û hîna ê wextî mi terorê wesayîtanê zirxinan dî’ û wina domna: “Ez o wext bîya şahidê terorê wesayîtanê zirxinan. Nê wesayîtî zirxinî bi çarçeweya konseptêk de hereket kenî. Tena qetlîyam nêkenî, cuya rojane zî tacîz kenî.”
Bi hawayo organîze
Yolerîye dîyar kerde ke ‘wesayîtê zirxinî Kurdistan de sey haletê qetilkerdişî yenî xebetnayîş’ û wina va: “Qetlîyamê wesayîtê zirxinî qezayê basîtî nîyî. Senî ke serranê 90î de ‘Torosê Sipî’ merdiman remnayêne û qetil kerdênê, ewro zî eynî çî bi destê wesayîtanê zirxinan yenî kerdiş. Qetlîyamê wesayîtê zirxinî bi hawayo organîze erzîyenî dewre. Yê ke qetlîyamî kenî yenî pawitiş, manaya nê qetlîyaman na ya. Ma do sey pawitoxê heqê merdiman vera nê qetlîyaman de bêveng nêmanî. ”
Estena xo paweno
Avûkate Yolerîye peynîya qiseykedişê xo de va ‘ganî dewlete demêko rewêr nê qetlîyaman bivindarna’ û wina qedênaye: “Ganî êdî fek bi ferzkerdişê nê qetlîyaman ra vera bida. AKP hewl dano estena xo bi şîddet û terso ke netîceyê şîddetî de vejîyayo orte, bipawo. AKP kurd, elewî, cinî û hetanê bînan ser de şîddet meşneno û bi no hawa hewl dano îqtîdarê xo bidomno.”