Ez do nika ra pey, di heftan ra finê no koşe de binusa. Nuşteyê mi do zafêrî ziwan, kultur û perwerdeyî ser o bê. Mi heta nika bi seyan a nuşteyî kovar û rojnameyan de nuştê, labirê na fina verên a ke ez do koşeyê rojnameyê de bi kirmanckî (dimilî) peryodîk binusa. Cora, nika mi de heyecanêdo germ est o.
Rojevo sîyasî zaf germ o. Her ke şinê şertê ciwiyayîşê kurdan giran benê. Desthilatdareya sîyasî îmkanê dewletê pêrine bi kar ana û hêriş bena kurdan ser. Desthilatdareya dîktatorê dezgehî, rêxistinî û kesê ke boya kurdan ci ra yena, yan zî dostê kurdan ê, pêro xo rê kerdê hedef. Cora dewlete hêrişê rojnamegeran, rojname û televizyonan, qeçekan, parlamenteran, bi kilmeya hêrişê kurdan pêrin kena.
Nê rojan televizyonê kirmanckî o verên JIYAN TV zî girotî û kêberê ci mor kerdî. JÎYAN TV, gamêda tarîxîya ke 21ê adara 2016î de tîrêjê xo verday ziwan û kulturdê ma ser. Çi rê JIYAN TV girotî? Çike JIYAN TV, kirmancan sey parçeyê kurdan û kirmanckî zî sey lehçayêda kurdkî vîneno, alfabaya latînî ya kurdkî bi kar ano, Kurdîstanî sey welatê xo vîneno. Nê çî pêro xizmetê yewbîyayîş û hêzbîyayîşê kurdan kenê. Helbet no hesabdê îqtîdare nîno. Ke JIYAN TV ”zazaçî”tey bikardayê, do niyameyê girotiş.
Hele girotişê ZAROK TVî û Dibistana Ferzad Kemangerî ya Amedî dişmeneya dewleta tirkan a vera kurdan reyna îspat kerd. Tayn vanê ”ma çi aleqeyê ZAROK TVî bi sîyasetî esto”?. Goreyê înan esto, hem zî senî esto! Ke ziwane nîro nuştiş, wendiş û goşterey kerdiş aver nêşino. Gedanê kurdan bi goştareya ZAROK TVî ya ziwanê xo aver berdê. Seba ke dewleta tirkan hîmê xo dişmeneyda kurdan sero awan kerdo, domanê kurdan yê ke bi kurdkî qisey kenê xo rê taluke vînena. Dewlete zana, ke ziwanê kişta domanan ra qisey nêbo, o ziwan do vinî bibo. ZAROK TVî zî xizmet kerdê ke domanê kurdan (kurmanc û kirmancî) film û kay a ziwanê xo goştarey bikerê, binusê ke xo vîra nêkerê. Welat de weşanxaneyê kurdan her ke şino vêşêrî qîmet danê edebîyatê domanan. Nê rojanê peyênan de, Weşanxaneyê HÎVA bi nameyê “Pilingo” û “Gernas û Tavbanû”, bi kurmancî û kirmanckî di kitabê domanan yê bînî neşir kerdî.
Na dewlete nezdîyê se serran o ke na polîtîkaya înkar, asîmlasyon û zilmdê fizîkî ramena. Na polîtîka ziwan, kultur û nasnameya kurdan seqet kerd, labirê, ne şa kurdan bikero tirk ne zî fizîkî werte ra hewado. Do îqtîdarê AKPê zî nêşo kurdan wertera hewado. ZAROK TV şiro do DOMAN TV bîro, DOMAN TV şiro do GEDE TV bîro. Kurdî, kurdê verî nîyê. Çimê kurdan abîyayê, kurdî bîyê zanay. Kurdî wahêrê sîyaset û dezgeyan ê. Na dewlete bi zora otisîya ma nîna. A rinde ay a ke heqanê kurdan pêrine bide kurdan û na mesela bi awayêdo aştîane hel bikerê û ne sereyê ma bitewnê ne zî sereyê xo! Heta di hefteyî bimanê weşey de!