Teşebusê derbe ra dima bi îlanbîyayîşê OHALî zext û tedayê zîndanan de zî zêde bîyî. Zîndananê Tirkîya û yê Kurdistanî de heqê hepsîyan yeno xespkerdiş, cezaya hucreyî, surgun, îşkence, cilê tek tîpî û sewbîna xeylê kerdişê bêhuqûqî benî. Nê zîndanan ra yewe zî Zîndanê Cinîyan yê Padaye yê Sîncanî yo.
Hepsîyan ra Zeynep Avciye mektûbêk erşawite û bale ante neheqîyan ser. Avciye va ‘Zîndanê Sîncanî de demêko derg o ke qedexe û neheqîyî dewam kenî’ û wina dewam kerda: “Bi hawayo bisînor bo zî hepsîyî ge-ge yenî têhet. Labelê rojanê peyênan de wazenî embazan ser de nîzamo leşkeri pê bîyarî. Nêverdanî ke ma merheba daxî bidî embazanê xo.”
Avciye dewamê mektûba xo de bale ancena hedîseyêk ser û wina vana: “Tewr peynî korîdor de wexto ke embazî yewbînan verik kenî û gardîyanî mudaxaleyê embazan kenî û dima ra cezaya hucreyî danî embazan. Reyna verê cû cilê rengê kewe, keske û qehweyî ameybî qedexekerdiş, nika zî rengê sîyaye ameyo qedexekerdiş. Qedexekerdişê rengan yeno manaya derbazbîyayîşê cilê tek tîpî. Ma cinîyê hepsîyî do cilê tek tîpî qebul nêkerî.”
JINNEWS/ANQARA