Parlamentera HDPyî yê Mêrdînî Ebrû Gunaye derheqê tecrîdî de va ‘bi tecrîdî welat de demokratîkbîyayîş nêbeno’ û wina dewam kerde: “Zerrîya demokratîkbîyayîş û aştîye Girawa Îmrali ya. Eke şima ewja tarîtîye de biverdî, şima nêşênî demokrasî û aştî bîyarî welat.”
OZGUR PAKSOY / MA/AMED
18ê Hezîrane ra nata destûr nêdîyeno ke avûkatê Rayberê Şarê Kurdî Abdullah Ocalanî muwekkîlê xo reyde pêvînayîşan bikerî. No het de muracatê avûkatan yan bêcewab yeno verdayene, yan zî qerarê OHALî mehne yenî nîşandayene û pêvînayîşî yenî qedexekerdene.
Babete ser o Parlamentera HDPyî ya Mêrdînî Ebrû Gunaye qedexebîyayîşê pêvînayîşê ke 8 serran ra dima dest pêkerdbî de qisey kerd. Gunaye dîyar kerde ke tecrîdo ke Girawa Îmrali de yeno domnayene raştîya xo de sîstemêk o û wina domna: “No sîstem bi pêvînayîşan nîno wedarnayene. Wexto ke keye û avûkatî pêvînayîşan kenî zî tecrîd dewre de yo. Tena rayîrêk wedarnayîşê tecrîdî esto; o zî azadîya Birêz Ocalan û heme hepsîyanê sîyasîyan o.”
Gunaye dewamê qiseykerdişê xo de wina va: “4 pêvînayîşê ke Ocalanî dir ameyî viraştene de mesajê ke xizmetê aştî û demokratîkbîyayîşê welatî kenî, ameyî dayene. Birêz Ocalan hertim hemleyê ke vernîya şerî gênî û aştîye pê anî, keno. Labelê seba ke hukmatê AKPyî polîtîkayanê şerî ra miqate beno, nêyî nêwazeno. Sebebê tecrîdî polîtîkayê şerî yî. Tecrîd yeno manaya domnayîşê polîtîkayanê şerî. Operasyonê Pençe, Polîtîkaya Rojawanî ya AKPyî, sewqîyatê ke vera Rojawanî de yenî viraştene, tehdîdê ke vera Vakurê Sûrîye de benî û sewbîna xeylê çîyî estî. Labelê wexto ke Îmrali de pêvînayîşî benî, hertim ma vînenî ke Birêz Ocalan polîtîkayanê aştîye esas gêno.”
Destê înan de sebebêko huqûqî çin o
Gunaye bale ante qedexebîyayîşê pêvînayîşan ser û wina va: “Astengîyê ke wextê OHALî de ameyî vetene dima ra bîyî qanûn. Muracatê keyeyî de nê qanûnî sebeb yenî nîşandayene, labelê muracatê avûkatan de ti cewab nîno dayene. Çimkî no het de destê înan de sebebêko huqûqî çin o. Netîce de no welat de Wezîrê Edaletî vejîya, va ‘derheqê tecrîdî de ti astengî nêmenda’ û Serekkomarî zî va ‘avûkatî eşkenî şêrî, ti astengîyêka huqûqî çin a’. Raştîya xo de astengî çin a, labelê nika cewab nêdanî. Qedexebîyayîşê pêvînayîşan de ti sebebêko legal çin o. Rayraberdişê welatêkî cîddîyet wazeno. Coka merdim nêvîno, problem çareser nêbeno.”
Zerrîya aştî û demokratîkbîyayîşî Îmrali ya
Gunaye dewamê qiseykerdişê xo de va ‘ganî hukmat babeta tecrîdî de tewirê xo eşkera bikero’ û wina va: “Ganî hukmat proseso ke vernîya pêvînayîşanê avûkat û keyeyî akero, bido destpêkerdene. Eke hetêkê welatî tarîtîye de heto bîn roşnî de verdî, şima nêşênî welat demokratîke bikerî. No mumkin nîyo. O heto tarî peynîya peynî heme welatî ser o tesîr keno. Girawa Îmrali merkezê demokratîkbîyayîşê nê welatî yo. Zerrîya aştî û demokratîkbîyayîşî Îmrali ya. Coka ganî no proses demêko ravêr biqedîyo û heqê hepsîyanê Îmrali bêro şuxilnayene. No bi ti kesî nêdano vînîkerdene, tersê ci de do welat qezenç bikero.”