Çend rojî verê Komîsyonê OHALî ke do rewşa bi sehezaran kesê ke Qerarnameyê Hukmê Qanûnî (KHK) reyde wezîfeyê xo ra ameybî îxraçkerdiş ser o bivindero, amebî awankerdiş. Komîsyon mîyan de 7 kesî ca gênî û heta nika no het de 200 hezar muracatî estî.
Dewlete nê komîsyonî seba ke vernîya AÎHMî bigîra, awan kerde
Babete ser o Dr. Cenk Yîgîtero ke Unîversîteya Anqara de Beşa Huqûqê Pêroyî ra amebî îxraçkerdiş, qisey kerd. Yîgîterî va ‘Komîsyonê OHALî raştîya xo de vera Mehkemeya Heqê Merdiman ya Ewropa (AÎHM) de awan bî’ û wina domna: “Dewlete nê komîsyonî seba ke AÎHM aleyhê Tirkîya de qerar nêdo, yanî seba ke vernîya AÎHMî bigîra, awan kerde. Xora Serekwezîr Bînalî Yildirimî bi hawayo aşkere vatbî ‘ma Komîsyonê OHALî vera AÎHMî de vet’. Bi no hawa AÎHMî ra vatî, hîna rewşe hetê ma de domîyena.”
Sewbîna weçînite çin o
Yîgîterî dewamê qiseykerdişê xo de va ‘seba ke no het de reaksîyonê komelî kêmî bikerî, nê komîsyonî awan kerdî’ û wina dewam kerd: “Endamê komîsyonî do bi hawayo xoser tênêgêrî. Xora kapasîteya komîsyonî qîm nêkena ke heme muracatan ser o bivindero. Çimkî heta nika 130 hezar merdimî kar ra erzîyayî, xeylê sazî û dezgehî estî. 200 hezar muracatî estî û komîsyon nêşêno hemînan ser o bivindero.“
Mexdûrîyetê ma çareser nêbî
Dr. Cenk Yîgîterî vist vîrî ke mexdurîyetê înan hetê komîsyonî ra nînê çareserkerdiş û qiseyanê xo bi nê vatenan qedêna: “Ganî kontrolêko hîra ser nê prosesî de bêro kerdiş. Labelê îqtîdarî heme berpirsîyarî eşto nê komîsyonî ser. Eke dima ra sewbîna çîyî bibî, o wext nê 7 kesî do mesulê nê çîyan bêrî dîyayîş. Cok ra no komîsyon nêşêno çareser bikero. Ti mexdurîyetê ma hetê nê komîsyonî ra nîno çareserkerdiş. Ganî ma merkezê têkoşînê kede de ca bigîrî. Sewbîna weçînite çin o.”
DÎHABER/ANQARA