Li gorî çavakaniyên herêmî HPŞ, hêzên ser bi Qasim Şeşo û pêşmergeyan nekarî gundên Dahola û Burukê biparêzin. Li gorî ku Ezîdî Press radgihîne, bi 40 wesaîtên zirxî yên Humvee û dehan wesaîtên din êrîş birine ser herdu gundîn navbirî. Ji ber ku di destê hêzên parastinê de sîlehên li dijî wesaîtên zirxî nînin, nikarîbûn li ber xwe bidin û vekişiyane Şerfedînê. Li gorî heman çavkaniyê 20 şervanên Êzîdî di şer de jiyana xwe ji dest dane û halê hazir Şerfedîn bi xwe bi êrîşên DAIŞ´ê re rûbirû ye. Derdorên diyaneta Êzîdiyan hikûmeta Başûrê Kurdistanê gunehbar dikin bi neşandina alîkariya eskerî. Lewma heta niha di korîdora ku heta beriya bi demeke kurt vekirî re alîkariya eskerî dikarîbû ji bo şervanên Êzîdî bihata şandin, lê ev yek nehatiye kirin tevî ku gelek caran soza wê hatiye dayîn.

Asayîşa Zaxoyê du Şengalî birîndar kirin
Ji ber rewşa xirab a koçberên Şengalî li Zaxoyê û xemsariya rayedaran a li ser paraztina Şengalê koçberên Şengalî xwepêşandanek kirin. Asayîşa Zaxoyê dest werda xwepêşandanê û gule li xelkê reşandin. Di encama êrîşê de du koçberên Şengalî birîndar bûn.

HPG û YBŞ´ê 55 terorîst kuştin
Li aliyê din, pêr û doh li gundên li dora Şengalê şer di navbera hêzên HPG, YBŞ (Yekîneyên Berxwedana Şengalê) û çeteyên DAIŞ´ê de rû dide. Li gorî agahiyên ji deverê bi destketî di şer de 55 terorîstên DAIŞ´ê hatine kuştin. Şerên dijwar li gundên Bare, Sikêniyê, Şilo û Sulak qewimîne.

YJA-Star: Em ewlehiya gelê xwe ne
Fermandariya YJA-STAR a Şengalê jî der barê rewşa gerîlayên xweli Şengalê de daxuyaniyek da. YJA-STAR dibêje, “Tevî şert û mercên zehmet ên demsalê gelê me yê li Çiyayê Şengalê li dijî şilî û sermayê li ber xwe dide, zarok xwas in. Tu wijdan û dil vê ranake. ... Em wek gerîlayên YJA-STAR’ê li ser esasê perspektîfên Rêber Apo, em ê ji bo li herêma Şengalê mewziyên xwe bi hêz bikin, hemû nirxên Êzîdiyan biparêzin û ji bo ewlehiya jiyana gelê xwe pêk bînin, em ê têkoşin."

Çalakiyên YJA-STAR´ê dewam dikin
Di berdewamiya daxuyaniyê de hat gotin ku li dijî nêzîkatiyên komkujer ên çeteyên DAIŞ’ê çalakiyên aktîf didomin û hat gotin ku di demên pêş de jî ew ê van çalakiyan dewam bikin. Di daxuyaniyê de hat diyarkirin ku YJA Star bihêzkirin û mezinkirina YBŞ'ê, wek wezîfeyekê dibîne.

Save Shengal, Save Kobanê

Pêr êvarê, piştî ku nûçeyên êrîşên bi ser Şengalê de belav bûn, xelkê Kurd ê li Elmanyayê daket qadan û li bajarên Hannover, Bremen, Munster, Giessen, Wesel, Kleve, Bielefeld û Berlînê xwepêşandan li dar xistin. Di xwepêşandanan de êrîşn DAIŞ´ê hatin şermezarkirin. Xwepêşandêran doza alîkariya insanî û eskerî ji bo paraztina Şengalê li raya giştî û hêzên navneteweyî kir. Xwepêşandêran bi dovîz û afîşên xwe bal kişandin ser Berxwedana Kobanê jî û herî zêde jî şîara "Save Shngal, Save Kobanê (Şingalê rizgar bikin, Kobanê rizgar bikin)" derxistin pêş.

FRANKFURT