Bi ameyîşê payîzî êdî wextê mehsereyan o. Mehsereyî ewil cayanê berzan de dest pêkerd û cayanê bînan de zî bêmabên dewam keno. Rezan ra engure yena arêdayene û tira bastêx, kesme, sucuxe, dims û sewbîna çîyî yenî viraştene.
Engura ke yena arêdayene, qazikan de yena girênayene û netîceyê girênayîşê şîreyî de seba zimistanî çîyê werdî virazîyenî. Mehsereyî eynî wext de cayê piştîdayîşyewbînan û hetkarîye yî zî. Qezaya Hêne ya Amedî ra girêdaye taxa Mukrîyanî de welatîyî bi resayîşê engure hema vaje heme wextê xo rezan mîyan de derbaz kenî.
Welatîyan ra Şukrîye Orde ajansê Mezopotamya ra Omer Akinî rê qala viraştişê bastêxî kerde. Orde dîyar kerde ke ê ewil dest bi arêdayîşê engure kenî û dima ra şîreyê na engure vejenî. Orde wina domnaye: “Ma tayê herre erzenî mîyanê şîreyî. Badê ke girîya ma kefa ci gênî. Ma şîre erzenî mîyanê leganan û tayê vindenî. Eke wina nêro kerdene, o wext şîre tirş beno. Serdbîyayîşê şîreyî ra dima ma potikan ser o rakenî û binê tîje de verdanî. Tewr peynî beno bastêx û ma wedarnenî.”
AMED