No hefte aqûbetê Huseyîn Taşkaya ke, veriya 22 serran Sêwereg de ame vinîkerdin persiya. Keynaya Taşkaya Serpîl Taşkaya nûmayiş de qisey kerd û va: pîrika mi no meydanî de lajê xo geyriya, ez piyê xo geyrena, qeçekê mi zî bawikê xo geyrenê. Taşkaya aşkere kerd ke, heta ke aqûbetê piyê ci zelal bibo, ê dê tekoşînê xo yê edalet biramê.

Zey her hefte, no hefte zî Dayikê Şemiyê, serva persayişê aqûbetê qeçekanê xo, qora 559. de Meydanê Galatasaray yê Stenbol de are bî. Nûmayişkaran panqartê, ‘kiştoxî diyarê, vinî kotî de yê’ ra resîmê kesê ke binçiman de amey vinîkerdiş hewaday. Zey her finî, qernefîlê sûrî zî destê nûmayişkaran de bî. No hefte kulfet-malbatê Berkîn Elvan’î zî tewrê nûmayiş bî.

 

Bêcezakerdişî rê peynî bidê

Nûmayişê şemiyê de, no hefte aqûbetê Huseyîn Taşkaya ke, veriya 22 serran qezayê Riha Sêwereg de ame vinîkerdiş, persiya. Herzewbîn waziya ke, dosyeyanê cînayetanê ‘kiştox nêdiyarî’ de bêcezakerdişî rê peynî bîro dayen. 

Nûmayiş de verikîn lajê Abdullah Canan ke Gever de amebi vinîkerdiş, Tayyup Canan qisey kerd. Canan’î va, derheqê dosya de hewildayenê cezakerdişê kiştoxan çinî yo û va, ma wazemê nê dawayan de, peyniya bêcezakerdişan bîro dayen. 


Ê dê hesab bidê

Pey coy, keynaya Huseyîn Taşkaya, o ke veriya 22 serran Sêwereg de ame vinîkerdin, Serpîl Taşkaya qisey kerd.  Taşkaya vistvîrî ke, dapîra ay Fadîme Taşkaya, a ke no meydanî de cenazeyê lajê xo geyriya, aşma cotmengî de weşiya xo kerd vinî. Serpîl Taşkaya wina qisey kerd: Wexto ke dapîra mi merd, mi hîs kerd ke, piyê mi merd. Dapîra mi no meydanî de lajê xo geyriya, ez piyê xo geyriyaya, qeçekê mi zî bawikê xo geyrenê. 

Taşkaya va, ma no meydanî de biyê pîl. Ê ke wazenê ma no meydanî terk bikerê şirê, wa bizanê ke ma dê no meydanî terk nêkerê. Kesê ke heskerdeyê ma, ma ra girotî, ê dê rew ya zî berey hesab bidê. 

Badê Serpîl Taşkaya, apê ci, Faîk Taşkaya’yî qisey kerd û persa ‘herb do hewna heta çiwext biramo’ kerd. Faîk Taşkaya vistvîrî ke, heta ke no herb biramo, cînayetê ‘kiştoxê ci nêdiyar’ dê dewam bikerê û aşkere kerd ke, rolê çapemenî, domnayişê no herbî de girdo. 


Dosyeya Yedîgol amê giroten

Damûstayina çapemenî yê no hefteyî malbata Taşkaya ra Şehrîban Taşkaya wend. Damûstayin de vajiya ke, tirkiye de dadgerîn-mahkemekerdin polîtîze biyo, dawayanê ‘kiştox nêdiyarî’ de bêcezakerdin yeno ferzkerdin. Damûstayin de ame aşkere kerdin ke, dosyeya Nûrettîn Yedîgol ke 34 serrî ramit, hetê mahkeme serva hiqûqa zerreyîn ra amê giroten.


Taşkaya hedefê dewlet de bi

Nûmayiş de peycoy istanika Huseyîn Taşkaya amê vaten û hayr anciya tekoşîna ci ser.  Şehrîban Taşkaya vistvîrî ke Huseyîn Taşkaya şîdetê dewlet rexne kerd, cok ra hedefê dewlet û eşîretê Bucak de bi. 


‘Lajê to yê bînî zî benê vinî’

Taşkaya vistvîrî ke, bado ke zonayişî amey ke nameyê Huseyîn Taşkaya lîsteyê merdiş de yo, barê Stenbol kerd. Wexto ke, qedînayişê karê ke mendî şi Sêwereg, 6ê Kanûne 1993î de, hetê eskeran ame binçimkerdin. Peycoy malbat şî emniyet de aqûbetê ci pers kerd. Emniyet malbatî rê va, ‘şirê Sedat Bûcak’î rê perskerê. Bucak’î zî malbatî rê va, merdimanê ma girot û teslîmê dewlet kerd, neyra tepya şirê dewlet ra pers kerê. Wexto ke may Fadîme Taşkaya fina şî emniyet, sermiyanan cirê vatî: ‘Fina meyêr tiya, lajanê xo yê bînan ra piya, tiya terk bikerê. Zewbîn ê zî benê vinî. 


Heta ke aqûbetê ci zelal nêbo…

Pêrokîn muraceatê malbatî bê netîce mendî.  Şehrîban Taşkaya aşkere kerd ke, waliyê o wextî yê Riha Tevfîk Ziyaeddhin Akbulut û waliyê OHAL Unal Erkan ra piya sermiyanê bînî yê o çaxî mesûlê qetilkerdişê Huseyîn Taşkaya yê û waşt ke pêrokîn mesûlî bîrê cezakerdiş. Taşkaya peynî de vist vîrî ke, heta ke aqûbetê Huseyîn Taşkaya nîro vaten, na  dosya serva-qandê ma nîna giroten. 

 DÎHA/STENBOL