Qezaya Mazgirtî ya Dêrsimî ra girêdaye herêma Akpazarî de dewa Surekî de bi talîmatê Walîyê Dêrsimî û qayûm Osman Kaymakî leşkeran mezelanê Sancar Buluç (Seyîd Riza) û Baran Çetînkayayî (Brusk Dêrsim) taxrîb kerdî.
Dayîka Baran Çetînkayayî Fadîme Çetînkayaye derheqê taxrîb bîyayîşê mezelan de qisey kerde.
Çetînkayaye va ‘dewlete dest bi rijnayîşê mezelan kerda û şarî vera rijnayîşan reaksîyon nîşan da’ û wina dewam kerde: “Ma destûr nêdanî ke mezelanê ma birijnî. Wexto ke ma şarî reyde meşîyayênê, vera sîlehanê xo dayî ma. Înan waştênê ke heme mezelan birijnî, la şarî ra tersayî. Tena yew di parçeyî rijnayî.”
Sucê şerî yeno kerdiş
Çetînkayaye va ‘wexto ke ma waşt ke parçeyanê mezelî bigirî, vatî qerarê walîtî esto, labelê orte de qerar çinêbî’ û qiseykerdişê xo wina domnaye: “Sey yew dayîke rijîyayîşê mezelan ver zerrîya mi veşena. Ma do heta peynî erjanê xo bipawî. Kerraya mezelî ra çi wazenî? Ma nînan ra nêvanî dewlete; çimkî ti dewlete de çîyêko winasî çin o. Ez qebul nêkena û heta dalpeya peyêne ya gonîya xo, ma do pey şehîdanê xo de bibî. Ez seba referandûmî veng dana heme şaran ke wa şar seba referandûmî hesas têbigêro û vajo nê. Ma vanî ‘Nê’, ‘Nê’, ‘Nê’.”
ŞÛJIN/DERSIM