Weçînayîşê 24ê Hezîrane rê tena 2 rojî mendî. Partîya Demokratîke ya Şaran 20ê Hezîrane de Rasteyê Îstasyonî yê Amedî de mîtîngêk organîze kerde. Bi sehezaran merdimî beşdarê mîtînge bîyî û vera polîtîkayanê hukmatî de mesajê muhîmî dayî û 7 serreyî ra heta 70 serreyî bi sehezaran merdimî têfek ra azadîya Ocalanî waştî.

Partîya Demokratîke ya Şaran 20ê Hezîrane de bajarê Amedî de mîtîngêk viraşte û na mîtînge hem xebata weçînayîşî ya fînalî bîye û hem zî mîtînge eynî wextî de weçînayîşî ra ver atmosferê weçînayîşî nîşan daye.

Mîtînge Rasteyê Îstasyonî de ameye viraştiş û seke yeno zanayene no raste eynî wextî de rasteyo ke 5ê Hezîrana 2015î de tede bombeyî teqaybî bi. Herçiqas ke wina bi zî 7 serreyî ra heta 70 serreyî bi sehezaran merdimî herikîyayî warê mîtînge. No eynî wextî de cewabê teqayîşê bombeyan yê 5ê Hezîrane bi zî. Bi sehezaran kesî têfek ra mesajê ‘se beno wa bibo, ma do tepîya game nêerzî, ma do vera bombeyanê şima de bi rîyê xo cewab bidî’ dayî Erdogan û hukmatê AKP.

Rojnamegerêkê beşdarbîyayîşî ser o şîroveyê ‘ez 10 serrî yo ke Amed de xebetîyena, labelê reya sifteyîne ya ke ez hende merdiman no raste de vînena’ kerd û no şîrove daxî beşdarbîyayîşê mîtînga 20ê Hezîrane şinase keno. Çimkî baskê mîtînge hetêk de ver bi semtê Ofîsî, hetêk ra ver bi Baglar û hetêk ra zî ver bi Sûrî derg bîyênê. Merdim eşkeno vajo mîtînge hetê beşdarbîyayîşî de sey Newrozêka Şenike bîye. Tena duyê Newroze kêmî bî, labelê coşê ci yê Newroze ra kêmêr nêbî.

   

Qasê rayêk canê to esto

Hêzê dewlete eleqeyê şarî ver har bîyî û şarî ser o zextê girdî kerdî. Haletê ke sînyal birnenî ardî rasteyê mîtînge û weşanê ganî ame birnayîş. Reyna polîsan dest rona ser pankart û dovîzan. Mîtînge de siloganê ‘Ma do bi xoverdayîşî qezenç bikerî’, ‘Şehîd nêmirenî’, ‘Bicuye Rayber Apo’ û sewbîna ameyî eştiş û pankart û dovîzê ke ser o ‘Cinî cuye azadî’, ‘Cinîyî do faşîzm birijnî’, ‘Qasê rayêk canê to esto’, ‘Ma destur nêdanî faşîzmî’ û sewbîna ameyî kiriştiş.

Şarî mîtînge de sere de vera tecrîdo giran ke Rayberê Şarê Kurdî Abdullah Ocalanî de ame domnayîş de û qedexe, rijnayîş û sewbîna kerdişanê OHALî de reaksîyon nîşan da. Bi sehezaran kesî bitaybetî vera vatişê Erdoganî yê ‘problemê kurdî çin o’ ke tewr peynî Amed de vatbi de reaksîyon nîşan dayî û vera polîtîkayanê 3 serrê peyênan yê AKPyî de hêrsê xo nîşan dayî. Namzedanê HDPyî ra Selçuk Mizrakliyî raste de va ‘Rasteyê Amedî, AKP kerd partîya tabelaye’ û no vatiş derheqê netîceyê weçînayîşê 24ê Hezîrane de tespîtêko muhîm bi.

Azadîya Ocalanî ame waştiş

Kesê ke o raste de bî, ferqê ci de bî ke ê seba çi ewja de yî. Zafaneyê beşdarvanan ciwan bî û no zî mesajê neslo newe çiqas aştî û azadîye de biisrar o, bi hawayo aşkere nîşan dayêne. Reyna namzed û îdarekarê ke mîtînge de qisey kerdî, mesajê xo bi hawayo zelal dayî. Merdim eşkeno bi hawayo aşkere vajo ke beşdarbîyayîşê bi sehazaran merdiman yê mîtînge, tesîrê xo qiseykerdişê namzed û îdarekaran ser de kerd. Zafaneyê qiseykerdoxan bi Ocalan, xoverdakarê Sûrî û sewbîna dest bi qiseykerdişê xo kerdî. Qiseykerdoxan bale antî tecrîdo ke Ocalanî ser o dewam keno û azadîya Ocalanî waştî.

 

AMED