RIFAT ŞAHÎN / DEVRAN TOPTAŞ / MA/AMED
Seke yeno zanayîş heme weçînayîşê ode û borsayan bi Qerarnameyê Hukmê Qanûnî (KHK) ameybî betalkerdiş. Xora 15ê Temmuze teşebusê derbe ra dima xeylê qayûmî tayînê şîrketan bîyî û weçînayîşê ode û borseyan zî amebî taloqkerdiş.
Babete ser o Namzedê Odeyê Tîcaret û Sanayî yê Amedî (DTSO) Mehmet Kayayî qisey kerd. Kayayî va ‘taloqkerdişê weçînayîşan şaş o’ û wina domna: “Demokrasîya ke ma de esta çi heyf ke TOBB de çin a. Ganî rêxistinêka sîvîle hertim hetê şarî de ca bigîro. Nika yeno vatiş ke do weçînayîşê ode û borsayan do teşrîna verêne û teşrîna peyêne de bêrî viraştiş. Labelê bi hawayo tam nîno zanayîş ke do bêro viraştiş an nê.”
Operasyonî sermayegozarî asteng kenî
Kayayî dewamê qiseykerdişê xo de va ‘demanê peyênan de bin nameyê FETO û KCKyî de xeylê operasyonî vera karmendan de ameyî viraştiş’ û wina dewam kerd: “Bi no hawa karmendî yenî lînckerdiş. Nê operasyonî vernîya sermayegozarîye de benî asteng. Zaf karmendî seba ke tersenî, sermayegozarî ra remenî.”