Muzîsyen Baran ke Meydanê Seyît Riza yê Dersim de her şan de muzîka xo îcra keno, bi behaneyê nêrehetî dano çorme, raştê mudaxeleyê polîsan ame. Welatijan nayî rê nêrazîbîyayîş damûsna û aşkere kerdî ke, esas iyê ke nêrehetî danê polîsî bi xo yê.
Muzîsyen o bi nameyê Baran ke jew hefteya Dersim de bi muzîka xo pere keno qezenc, raştê mudaxeleyê polîsan ame. Baranî da zanayîş ke polîsî verîya hîrê rojan şîyê û kamîya ci giroto, jû roj dima ra zî ageyrayê û Baranî ra vatê ’Ti nêşkenê muzîk virazê’. Polîsan vato ke ganî walitî ra belgeyê destûrî bîro girewten.
‘Kuçeyî aîdê însanan ê’
Baranî da zanayîş ke alwozê ci yê gîtarîst bi no sebebî şi û bi nê vatenan nêrazîbîyayîşê xo ard ziwan: “Kuçeyê aîdê mordeman ê, aîdê sazîyan nîyê. Kuçeyan de hendayê çîyê xirabî benê ke, wa şirê bi înan ra eleqedar bê. Ma hunermendê, zerarê ma kesî ra çin o. Vera muzîkî de vindertiş bêmane yo.
Muzîsyen Baranî vist vîrî ke şar wayîrê înan û muzîka înan vejyeno û va, ‘Ma jû roj nêvejyay, şarî, yê ke ma ser rayîran de dî bi vatişê ‘Şima çima şan de nêvejyay’ pers kerdî. Baranî da zanayîş ke muzîk ziwanê ci yo û o zerrî ra wayîrê ci vejyeno. Baranî aşkere kerd ke o xo bi muzîkî îfade keno û vist vîrî ke azadîya ci ya îfade destê ci ra amê girewtiş.
‘Dewlet qedrê rindîye nêzana’
Dersimijan ra Nûrhayat Gun ke her şan de şina kilamanê Baranî goşdarî kena da zanayîş ke muzîka kuçe, her cayê dinya de reng û ganîyîye dana kuçeyan. Gun vist vîrî ke a Almanya ra seba zîyaretê merdimanê xo û seba tewrbîyayîşê festîvale şîya Dersim û wina qisey kerd: “Ma pêrokîn eve dejê hardê xo û eve şertanê zehmet de yenê îta. Demo ke ma kerdenanê winayî vînenê ma dejayenê. Ez fehm nêkena ke çima qeyûm festîvalî rê beno manî. Herzewbîn destûrnêdayîşê muzîka kuçe rê zî ez şaş bîya. Ma her şan de sonê goşdarîye muzîkî kenê û ser înternet ra bare kenê. Çi heyf ke na dewlet qedrê rindîye û xasekîye nêzana. Xasekîye ra tersenê.”
‘Polîsî bi xo nêrehetî danê’
Cinîyan ra Gamze Can ke Xarpêt ra ya zî da zanayîş ke a muzîke zey sebebê nêrehetî dîyayîşê polîsan komîk vînena û wina va: “Muzîk nêrehetî nê, rehetî dana kuçeyan, reng dana kuçeyan. Esasî de yê ke nêrehetî danê kuçeyan polîsî bi xo yê.”
Senîha Dag û Mehmet Çolakî ke Stenbol ra şîyê Dersim zî aşkere kerdî ke muzîk serbestîye ana vîrî.
ŞÛJIN/DERSIM