Rozê de ponc reye nimaj keno, hama 50 reye zî zurkeno.
Dîna heşiya pê hepisxananê Tirkiye de se beno, o vano teyna jû mordem rozê merdene dero.
Mavên ra xêle waxt ranêvêrd, wezîrê adaleta xo, o zur vet. Wezîrê adalete more zî da. 600 ra jede. Hurdemîne zî aynî sate de qesey kerd.
Bi zuran wazeno xo bixelesno. Ya zî jû mesela nêwazeno bivîno. Hen fkrîno ke ey ke meseleyî nêdî, homete zî nêvînena.
Qeyta nêsermayeno. Riyê xo qeyta sur nêbeno. Hen zonena ke riyê ci ameliyat kerdo, riyê robotan o.
Waxtoke zurkerd, riyê de jû hereketê sermayenê çîno, sawoke hêrsê xo rî de merdê. Hêrsî şiyê rî de can nêmendo. Îşte mordemode niyaneno.
Se vatî bî naye ra çond serrî ra avê Moskova de: “Sima ke mesela kurdî nêfikriyayî na mesela çîna.”
Felsefa xo na wa. Dîn û îmanê xo na wo. “Mevîne, înkar bike, meseleyî werte ra darînê we, benê vîndî.”
Îmankerdoxan rê en heqereto girs no mordemek keno.
Vijdan-mijdan tey nêmendo. Derdê xo zî hora vijdan niyo, cizdan o. Her ca de aboriya Tirkiye goyneno, zovîna qisaweta xo çîna.
Sawoke Tirkiye biya cenetê haştiye, herkes serbest o û 132hezar ra jede însanî hepisxanan de niyê.
Sawoke 30 serrî yo dewleta tirk verva kurdan herbo qilêrin nêramena. Û sawoke hukumatê AKaPe 10 serrî yo na herb verva kurdan devam nêkeno.
Hometa Tirkiye zî xo noro kerenî. Zurkerke se vat, ey qebul kena. Zovîna caye biyenê, homete tenê veng fîştenê ra xo. Hama Tirkiye biya welatê Qazîstanî û Lînçîstanî. Polîsê xo bi tonan qaz anê kar, însanê xo kurdan lînç kenê.
Heto bîn ra taye roştber û rojnamevanê tirk seweta qedenayena rozê merdene venga mehkuman danê. Nî zî tam biyê xizmetkarê axayê xo. Niyadê, seweta halkerdena mesela venga hukumatê xo nêdanê. Sawoke mehkuman heqa zonê mayan înan dest ra gureta. Honde mezgê qefçilî estê, Qazîstan û Lînçîstan de.
Bi xo demokrat osenê, hama raştiye de faşîst yê. Çike her tim suc erzenê kurdan ser, kurdan nêq vînenê.
Kurdî çalakiyanê protesto virazenê, vanê “niya mekerê, rayanê arabanê ma mecerê.” Kurdî wazenê roşana xo bimbarek kerê, nî vanê “hukumatî desture nêda niya mekerê.” Kurdî kunê grevê vêsaniye, nî vanê “hen mekerê, sima vireniya halkerdena mesela cenê.”
Hama kurdan ke vengê xo nêvet, nî mordeemî her roz AKaPe goynenê û vanê “na hukumatî karode rind kerdo, welat de sukutiye esta.”
Raştiye de nî mordemê tole demokratî, zerre faşîstî kurdan ra teslîmbiyayene wazenê û hemkarê multî zurker yê.
***
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.