Neyaran ser Çewlîg zaf kaykerdo. Neyaran hina ser Çewlîgî kaykerdo ke, zê verênanî ma vanî, “eyarî ra veto”.
Hina bîyo ke Çewlîg raştîya xora dûr kewto. Hem zî zaf dûr kewto. Beno ke nê qiseyê mi zore tayî kesan şêrenê, la reyna raştî vatiş hewce keno. Çewlîgijî hetanê raştîya xo ra rî bi rî nêmanê, ê dê zaf çîyê xirab bivînê. Çewlîg de hina bîyo ke herkes zereyê keyeyê eyê de, zereyê Çewlîg de, zereyê Kurdistan de çi beno nîyeno vînayîş.
La Filîstîn, Moro, Çeçenîstan, Afganîstan û Arakon de se beno, hayîya Çewlîgijê ke welatperwer nîyê pê bena. Rojdem înan de neyar (dişmen) Çewlîg de se keno, Kurdistan de se keno çino! Çimê înan neyar û dagîrkerî nêvînenê. Çewlîgijê ke welatperwerî nî yê, seba cayê dûrî doxtor î, la seba xo kerr, korr û lal î. Hele rojê îne û yenî bo mavaji Filîstîn û Arakon de çîyêk bîyo, pêronê înan nimajî dima ra camî ra vejîyenê, şîyar (slogan) erzenê vanî, “Allahu Ekber! Biciwîyo (bijî) Filîstîn! Wa bimiro Îsraîl!”
Tena qey (serva) Filîstînî nê. Wexto ke dewlete Tirkî hêrîşê şarê kurdî û HDP-DBP kena, seba ke hêrîşê HDP-DBP bikero yew plan kena, ca de Çewlîg de ajananê xo visnena herekete. Nimûne, aşmek verê cû rojêk verê 8’ê Adare de Ozgur Gundem de yew karîkatur amebi viraştiş. Karîkatur de amebi resm kerdiş ke, Hz.Muhammed vano, “Cennet bine linganî dadîyan de yo”. La AKP, dadî û cinîyan erzena binê linganê xo. AKP û dewlete tirkî qey (serva) nê karîkaturî ajanê xo vistî herekete û va, “Way! Hemvere Hz.Muhammedî heqeret ameyo kerdiş. Gera herkes hêrîşê Ozgur Gundem’î bikero”. Ser nê planê Çewlîg û çend cayan de hêrîşê Ozgur Gûndem’î kerdî.
Dewlete tirkî Çewlîg de hina hişê Çewlîgijan bena ke, tayî Çewlîgijî vanê, Surîye, Çeçenîstan û Afganîstan dest derge namûsê cinî û keynayê muslumanan bîyo, nayî ser şinî înan cayan de şer kenî û yenî kiştişî. La eynî Çewlîgijî, 8 subayê Tirkî 4 serrî qezaya Bongilan’î (Solhan) dewa Hezar Şa de dest derge yew keynayê qijkek kenî, seba keynayê xo yew veng zî nêkenê. Hetta 8 subayê tirkî ceza zî nêgenî û yenî veradayîş. Tena HDP û DBP’yî ser na bîyayîşî vindertî.
Eynî çi qezaya Darahênî dewa Ware Merg de zî bi, reyna Çewlîg bêveng mend. Nika zî vejîya werte ke, zereyê Çewlîg de dest dergî ser tutêk bîyo. Kamî dest dergî kerdo yew bi yew herkes zano. Vanî mîyanê înan de ayê ke çetê DAÎŞ’î, AKP’yî û Hîzbul-qontra Hudaparijî estî.
Çewlîgijê welatperwerî sey ayê Kongreya Îslam yê Demokratîk, HDP û DBP’yî şermezar kenî, la Çewlîgijê bîn ra veng çino. Qey (serva) Çewlîg’î no şermêk zaf girdo. AKP û dewleta tirkî exlaq û wijdanê şarî û bi taybet yê şarê Çewlîg xirab kena.
Çewlîgijî ewro wayîre exlaq û însanîyetî nêvejîyenê, tîya ra pê neşkenê bi ewnê yewî ra. Eke Çewlîgijî hemvere neyaran wayîrê qij, keyna û cinîyanê xo nêvejîyenê, senî vanî ma Musulmanî!
Senî vanî ma kurdê!
Senî vanî ma însanî!