Peynîya weçînayîşê 7’ê hezîrane AKP Kurdistan de dest pê konseptê şerî kerd û çarçiweya no konseptî zî her roj Kurdistan welatijek yenî qetilkerdiş, dijî no konseptî zî şarê kurd zî xoverodayîşeko gird nişan dano û xo bi xo pawiyeno. Gorê raporê ÎHDe mîyanê dîrokê 21 temmuz û 28 tebaxe de 92 lejker, polîs û 38 gerîla zî cuyayîşê xo vinî kerdî. Hewna rapor de yeno vatiş ke zey demê 90’î sivîlî raşteyan de yenî qetilkerdiş û 47 sivîl amey qetilkerdiş û 2386 kesî zî bi operasyonê sîyasî de amey binçimgirewtiş.
Rewşeko xirap
Sereka ÎHD ya Stenbolî Zeynep Ceren Boztoprak ser operasyonê sîyasîyî qise kerd û vat ke çi heyf ke peynîya weçînayîşî dewlet xo bi xo ravêreyeya çareserî xirap kerd û wina vat: “Nika dewlet sivîlan qetil kena. Nê terteleyî zî vîrê merdimê serrê 90’î anena, çi heyf ke nika serrê 90’î ra hîna xirap yew tablo esto. Guya AKP vatî dewlet kurdan ra zilm kena labelê nika AKP vatişê xo vila vet û dewlete ra hîna xirap zilmê şarê kurd kena. Nika Kurdistan de AKP bêfermî rewşo îstîsnayî şuxulnena.”
Kam dewlet axê xo ra hêriş kena
Boztoprak bal ant ser bomvarnayîşê Kurdistanî û wina peynî kerd: “Dewleta tirk bi bombevarnayîşê Kurdistanî aşkera vana ke noca welatê min nîyo, şarê kurd zî sewbî welatî de cuyenî. Çimkî qet yew dewlet axê xo ra bombe nêvarnena. Çi heyf ke vengê aştîye dewlet Kurdistan de sivîlan qetil kena. Nika Kurdistan de operasyonê sîyasî zî domyenî, mîyanê di aşmî bi hezaran kesî ame girewtişî eke ona dewam bikero do bi hezaran kesî hîna bêrê girewtişî, no ser zî ganî aştîye rê Mutabakatê Dolmabaxçeye bêro şuxulnayîşî.”