Her serre bi ameyîşî wisarî xeylê nebatî tebîetê Kurdîstanî ra yenî arêdayene û bazaran de yenî rotene. Nînan ra yewe zî ribêsa ke sey muza rojhelatî yena zanayene ya. Ribêse aşmanê nîsane-gulane yê wisarî de yena arêdayene.
Ribêsî bitaybetî Xarpêt, Çewlîg, Dêrsim, Erzîrom, Mûş, Bedlîs û xeylê bajaranê bînan de resenî. Bi nameyê Yusuf Penzerogullariyo ke Garajê Xozatî yê Xarpêtî de ribese roşeno, dîyar keno ke emser seba ke varayîş bol bîyo, nebatê sey ribêse û gulîk zî bereketin o.
Penzerogullari vano ‘nê her di nebatî xeylê nêweşîyan rê baş î’ û wina dewam keno: “Ribêse nêweşîya şeker, kolesterol û xeylê tewiranê kanserî rê baş o. Eke qalikê ribêse bêro kelênayene û awa ci wextê vêşanîye de bêro şimitene, seba hemilnayîşî zaf baş o. Badê ke şîfayê ci ame famkerdene, ma teberê welatî ra zî sîparîşan gênî.”
MA / XARPÊT