Ti ma rê nêbîya paytext, ti ma rê bîya bêbext. To ma ra can guret, to ma ra gonî gurete, to ma weşaweş kiştîme. Ti paytextê destqilêrinan û paytextê gonîweran a Enqere.
Rojan ra oncîya rojade sîyaye bîye, rojade gonine bîye, rojade şemîye bîye. Oncîya bombeyî serê zerrîya ma de û zereyê mezgê ma de teqayî. Ma kerdîme lete-lete, ma kerdîme tîke-tîke, ma kerdîme hurdî-hurdî… Oncîya dişmenê bêbext û bêwijdanî destê xo hene kerdî.
Rojan ra oncîya rojade sîyaye bîye, rojade gonine bîye, rojade şemîye bîye.
Oncîya sîya der îme, oncîya kederin îme, oncîya dej der îme, oncîya şîn û şiware der îme. Enqere bîye Enqere, serê hardanê xo ra qetlîamêde nîyanên nêdî.
Na reya çendin a ma
mirenîme; Enqere?
Hetê ma ra çêyê to biveşo Enqere, çêyê to biveşo Erdogan, Davutoglu, Altinok, çêyê şima biveşo! Çêyê şima biveşo, gonîwerî, zulmkarî, bêbext û xayînî, çêyê şima biveşo! Çêyê şima biveşo zurekerênê, dizdênê, bênamusênê, çêyê şima pêrune biveşo!
No qetlîamo çendin o?
Qetlîam qetlîam ser de yeno.
A seate de kotî bî MÎT û ÎTê şima? Ajan û polîsê şima, emnîyet û îstîxbaratê şima kot bîyî? A seate de kot bî kelp û kutikê şima? A seate de MÎT û ÎTê şima verê çêberê sarayî yê gonîwerê dîktatorî de bî, ya verê çêberê AKP de bî?
Destê MÎT û ÎTanê şima ra, destê ajan û polîsanê şima ra, destê dîktatorê şima ra boya gonî yena.
Ma bi nê gonîweranan, bi nê zulmkaran, bi nê dizdan, bi nê bêbext û xayînan bira nêbenîme û nêbenîme kî. Dejo ke min dano berbiş, eke to dano huyayîş, o waxt ma bira nêbenîme.
Dişmeno ke dişmenê gonîya ma wo, dişmeno ke dişmenê gonîya Weyselî yo, ma ê dişmenî de se benîme bira, se? Weysel hona domano new serre bî, şîyêne mekteb wendênê û bîyêne pawitox.
Ma ê dişmenî de se benîme bira, se?
Ma Kadîr Uyan? Ey kî grûba tîyatroyê “Areyê Kayî” de kay kerde. Ey zonê xo yê dayîke kirmanckî (zazakî) de hona tîyatro de kay kerdêne, hona zonê xo de lawikî vatê, hona zonê xo de hewnî dîyêne… Ma Guney Dogan? O hona zanîngeh de telebe bî û hona wendegehê xo nêqedenabî…
Ma Ozver Gokhan Arpaçay? Ozver hona hîris û di serrî bî. Wendegehê xo xelesnabî û bîbî malim. La ey karê malimênî nêkerd, karêde bîn ser o gureyayêne û qayîtê pîyê xo yê nêweşî kerd…
Ma Dîlane Sarikaya? Dîlane hona vîst û di serrî bîye. A kî hona zanîngeh de wend, wendegehê xo nêxelesnabî. Çênekade azebe bîye û xeyalê xo bî…
Ma Erol Ekîcî? Ma Adîl Gur?
Ma Mesut Mak..?
Rew-herey hesabê nê mazluman roje ney rojê, zulmkaran ra yeno pers kerdene. Gonîya şehîdan hard de nêmanena. Nê mazluman raya aştîye de canê xo da, ê şehîdê aştîyê û azadîye înan birûmet yad kenîme û înan ver de bejna xo kenîme çewt. Şehîdî nêmirenê û gonîya şehîdan kî hard de nêmanena!