“Bi aşkera taxamulê kurdî nêkenê la seba ke planê xo aşkera nêkê heme nameyan qedexe kenê. Min demo ke ez name pank nêkena, no demî min rê gef wendê û vatî ma do belge nêdanê to û ti zî nêeşkerê bixebitî. Min mecbur hawana.”
LÊL AMED / AMED
Hedîseyê 15’ê Temmuze rê pey Tirkîya de OHAL ame îlankerdiş la belê Hukimatê AKP û MHP bi no OHAL taybetê sîyasetmedar, sazî û partîyê Kurd hedef xo rê girewtê. Şaredarîyê Kurdan rê qeyiman tayin kerdê. Zey nê qeyiman rê wezîfe ameyo dayiş, taybetî sazîyê cenî û sazîyê ke seba ziwanê kurdî xebat kenê girewtê ya zî xebatê înan qedexe kerdê.
Aşkera bî ke qeyiman ona kurdî rê tersenê ke nameyê dingê taksîyan ke Amed de sey Newroz, Azad, Rihan, Zana, Kûçe, Musa Anter, Welat û seybînkurdî yê destpê qedexekerdişê nameyan kerdê.Hetta taksîkarî ke nameyê domananê xo yê ke bi kurdî taksîyê xo rê elaqnayê, zabitayê qeyumî înan rê vatî nê nameyan pank bikê taksîyan rê. Babete ser o taksîkar Mehmet Asana qise kerd.
Vera kurdî qedexeyan
Taksîkar Mehmet Asana aşkera kerd ke verê Weçînayişê Xocayî yê 2019î ver, taksîkaran her serre bi mecburî Şaredarîya Girde ya Amedî rê gireda UKOMEyî rê belge gênê, emserre sey serra bîn ê şîyê UKOME no demî zî Qeyim Cumalî Atîlla bîyo û wina vat: “Ma taksîyan ser o nameyê dingê xo nusenê û ma hetanê nika qet persgirêk nêciwîya bî la belê sibata 2019î demo ke ma şî, ma rê persgirêk vetî. No ser zî min zî bertek nîşan da û min vat ke nameyê dingî zaneyîş seba hawila welatijan o. Min zî eke hetanî nika mudaxele nêkerdî, ewro qedexe kenî se vera kurdî yeno kerdiş.”
Taksîkar Asana dîyar kerd ke Amed de zaf hûmarî de nameyê dingê kurdî yo û wina domna: “Misal yew taksî ame ser ci Newroz nusaynê, no demî fam kerd ke armancê înan qedexeyê kurdî yo. Bi aşkera taxamulê kurdî nêkenê la seba ke planê xo aşkera nêkê heme nameyan qedexe kenê. Min demo ke ez name pank nêkena, no demî min rê gef wendê û vatî ma do belge nêdanê to û ti zî nêeşkerê bixebitî. Min mecbur hawana.”
Bi ceza gef wanenê
Asana bal ant ke demê qewumê diyine de zî teda û zilm vera taksîkaran zêdîyayo û wina qedîna: “Ma yew roje, dingî de ronişte bî, saetê şane de ekîbê zabitayî ameyê û ma rê vatî dingê şima de nameyî estê û nameyan pank bikê. Peynîya taksîyê min de nameyê lajê min Kendal nusaynî û zabitayan no name zî biwanê. Min bertek nîşan da û nameyê lajê min o, heme wesayîtê şexsî û sazîyan de name yeno nuştiş. Zabitayan vatî do ma her ca ra bihawanê. Ewta Amed o û ewta de her kes name kurdî weçîneno. Peynî ma ra vatî eke şima nameyan pank nêko do ma ceza bibirnê şima rê. Bi aşkera texamulê kurdî nêkenê.”