Festîvala Kultur û Tebîetî yê Muzirî yê 19. ke 25ê Temmuze de dest pêkerd, bi konseran qedîyaye. Sîyasetmedaran ra Hemserekê Pêroyî yê HDPyî Sezaî Temellî û parlamenterê HDPyî Alîcan Onlu, Kemal Bulbul, Remzîye Tosune, Mûsa Farisogullari, Mûrat Çepnî, Îmam Taşçier û Dilşat Canbaz zî tede xeylê kesî beşdarê roja peyêne ya festîvale bîyî.
Temellîyî qiseykerdişê xo de beşdarvanan silam kerd û bi vîrardişê Huseyîn Cevahîr, Mazlûm Dogan, Sakîne Cansizan dest pêkerd. Temellîyî da zanayene ke ê bi serran o ke vera zîhnîyetê asîmîlasyonwanî de têkoşîn danî û wina domna: “Ma do têkoşînê xo zî bidomnî. Ma Kurd î, Elewî yî, Sunî yî. Nameyê ma Dêrsim o û ma do estena xo bi no hewa bidomnî. Ê se bikerî zî ma do têkoşînê aştîye bidomnî. Ganî ma wayîrê nasnameyê xo bivejyî û Tirkîya demokratîke bikerî.”
Temellîyî bale ante talano ke Dêrsimî ser o yeno kerdene ser Ayaz û Nûpelda ke teqayîşê mayînî ver merdbî vîr ardî. Temellîyî wina va: “Seba ke lazimîye bi enerjîyî esta, barajan nêvirazenî. Seba ke tûnika înan pirr bibo, tebîetê ma talan kenî, zozanan qedexe kenî û daristanan veşnenî. No welat de bi deshezaran mayînî estî. Ma heta ewro bi hezaran domanê xo şerî ver vînî kerdî. Ma do destûr nêdî ke ameyoxê domananê ma nê şerî de çin bibo. Ganî ma nê nameyan xo vîra nêkerî û hesabê înan bipersî.”
Festîvale de grûba Metîn Kemal Kahramanî deyîrê Kirmanckî vatî û dima ra Grûbe Munzûr, Grûba Veradaroz Folk Ensamble û Zelal Gokçe vejîyayî sehne û festîvale qedîyaye.
PÎRHA / DÊRSIM