Namzedê cenîya têkoşêr a HDPê Çewlîg, Dêrsim û Xarpêtê yew het ra seba temsîlkarîya axê xo destpê xebatê kerdî yew het ra zî çareserîya maxdûrîyetîya şaristanê xo dest pê xebatê kerdî. Namzeda HDP a Dêrsimê Edîbe Şahîn bi serran ke di mîyanê Tevgera Kurd de têkoşîn daya û têkoşîna xo domnena. Hewna namzeda HDP a Çewlîgê Sevgî Ogruç zî seba welata xo bi serrana têkoşîn dana û malbatê Ogruçê verba zilmê dewleta tirkê Serra 90’an de Çewlîg ra Stenbolê koç kerdo. Hewna Turkan Bîngol zî verba zîhnîyeta kapîtalîst û mêrdeyî de têkoşîndayiş rê Xarpêtê ra bî namzeda HDPê. Bîngol zî bi serrana ke seba heqê cenîyê têkoşîn dana û têkoşîna xo zî domnena.
Namzeda Dêrsimê Şahîn
Edîbe Şahîn di serra 1960’ê de Nazimîye ya Dêrsimê de ame dinya, perwerdeyê xo ya yewin û mîyanê Nazimiyeyê de temam kerd û peynî zî Lîseya Mamostetî ya Agirî ra mezûn bî û Şahîn peynî zî dest pê karê mamostetîya wekîlê kerd. Peynî zî Şahîn di sazîya dewletê Defterdarîya Dêrsimê de dest pê karê kerd la Serra 1980’ê Şahîn semedê xebatê sîyasî ra wezîfeyê xo ra ame dûrvistiş.
Şahîn taybetê warê heqê merdimatî û zîndanan de xebat kerd. Hewna di MKMa Stenbolê de rayedarê û kovara Rewşenê de zî edîtorîya hunerê kerd. Şahîn hewna seba zaravayê kurdî ya kirmanckî zî xebat kerd. Şahîn her tim di mîyanê xebatê Tevgera Kurd de ca girewt. Şahîn di projeyê şerwirmendîya psîkolojîk, rehabîlîtasyon, zaf kulturî û ziwanê dayike de perwerdeyê rê de koordînatorê kerd. Şahîn endamê sazîyê Komeleya Heqê Merdimatîya Stenbolê, Komeleya Pawiyayişê Serfkarî, Komeleya Cenîya Hewtrengê û Komeleya Domananê Omidê ya û aktîvîst a. Şahîn hewna seba koçberan ser xebatê pirtûkê kerdo.
Namzeda Çewlîgê Ogruç
Sevgî Ogruç di Çewlîgê de tena namzed cenî ya. Ogruç Serra 1984’ê di dewa Înaka Azapêrta Çewlîgê de ame dinya. Zey sewbî malbatan verba tade û zilmê dewletê malbatê Ogruçê serra 90’an de Çewlîg ra koçê Stenbolê kerd. Ogruç perwerdeyê xo ya yewin, mîyan û lîseyê di Stenbolê de temam kerd. Hewna Serra 2005’ê Ogruç Zanîngeha Bahçeşehîrê ra gireda beşa Fen-Edebîyatê û mamostetîyê kompîtorî wend.
Tevgera Kurd de cenî
Lîsansa xo berzî zî Ogruç di Zanîngeha Bîlgîyê de kerd. Ogruç zey sazîyê averberdişê kesane Dale Carnegîe de sertîfîkayan girewt. Ogruç di babetê cenî de zî xebatan kerd. Di serra 2013’ê de tezê xo ser di Tevgera Kurd de cenî ser dîyar kerd. Hema zî xebatê tez a Ogruçê domyena. Ogruç di rojnameyê Ozgur Gundemê de zî nuştoxê kerd, tewr peynî Ogruç HDPa Çewlîgê de xebat kerd. Ogruç zaravayê kurdî ya kirmanckî, tirkî û înglîlîzkî zanena.
Namzeda Xarpêtê Bîngol
Bi serrana ke bi polîtîkayê dewleta tirk î, ser şaristanê Xarpêtê zîhnîyeta faşîst û mêrdeyî bandorker o. Di mîyanê na rewşê de 35 serra ke Bîngol di mîyanê têkoşîna Tevgera Kurd de ca gêna. Bîngol serra 1964’ê di Palu ya Xarpêtê de ame dinya. Bîngol her tim di mîyanê xebatê partîyê de ca girewt. Bîngol qet fek xebatê hişyarîya zayendîyê ra nêverada.
Bîngol seba namzedê xo wina vana: “Ez hetanê nika verba zîhnîyeta tadeyox û zilimkarê de têkoşîn daya û ez zanena ke tena verba na zîhnîyetê HDP eşkena weş têkoşîn bido. Ez embazê xo dir 35 serra ke di mîyanê Tevgera Kurd de têkoşîn dana. Peynîya xoverodayişê Şêx Seîdî, bawkalê ma Farîs ma ra têkoşînê zey mîras verada. Ez wazena têkoşîna şarê Tirkîyayê bi partîya heme şaran di Meclîsî de bida cuyayiş. Çi heyfo ke tewr peynî demê di Tirkîyayê de qetilkerdişê cenîyan zêdîyayo. Taybetê Xarpêtê de zî cenîyan yenî qetilkerdiş û ez wazena cenîy do heme warê de xo binawnê û no ser zî ez Xarpêtê ra bîya namzeda HDPê.”
JINHA/AMED
Pergalî HDP do bibedilno
Namzedê wekîlê BDPî yê Stenbolî ra Alî Kenanogul û yê Sewasî Dursun Yildizî ardîy ziwan ke hemeyê problem pergalî ra yeno û HDP do pergala bi problem biqedîno ra elewîy zî vanêy ke ma do raya xo biderêy HDPî.
Weçînayişê 7 hezîranî bi diruşmeya ‘cuyayişê newe’ roj bi roj lez geno. HDPî ra zaf kesêy ke tewr bi tewr bawerîyan ra bîy zî namzetê HDPî yê. Ewropayî ra bigê heta Qerzî HDPî reng û vengeke jû perçe veto meydan û bîyo vengê heme şaran. Zaf pîrêy elewîyan û elewîy semedo ke bawer kenêy HDP do pergala xirabe esto bibedilno ra kar bikero ra vengê xo berz kerdîy ke do raya xo biderêy HDPî. HDP semedê wekîleteyî 4 namzetêy elewî lîsteya xo de bica kerd. Sere de namzetê Turgut Oker, Alî Kenaoglu û Muslum Dogan yenêy. Serekê Komeleya Pîr Sulgan Abddalî Dogan Uzun zî nameyan mîyan de yo. Turgut Oker zî serekê Federasyona Elewîyê Ewropayî yo. Alî Kenanoglu zî serekê kan yê Komela Kutirê Elewîyê Hubyar Sultanî yo û Stenbolî ra herêma 3 û 4 ra Kenanoglu û namzedê Sêwasî Dursun Yildiz ardîy ziwan ke elewîy ney weçînayişî de do raya xo biderêy partîya ke pertgalî bibedilno.
‘Biryara Elewiyan ca de yo’
Kenanoglu bi xebatêyxo yê akedemîya elewîyan zî yeno sinasnayişî. Ard ziwan ke no weçînayiş zaf muhîm o û wina dewam kerd: “Elewîy anêy ziwan ke problema herî gird pergalî ra qewimyeno. Partîya ke pergalî birizno zî na gam ma HDPî venenêy û ey semedî ra zî ma do ray biderêy HDPî. Eke HDP biser bikûro do Tirkîya biser bikûro û rayîra demokrasîyî de gaman bierzo.”
Kenanoglu berdewamî de qala heyecana elewîyan kerd û ard ziwan ke kelecan û heyecana elewîyan zaf zêdîyayo. Çimkî elewîy zî zey zaf kesan bawer kenêy ke BDP do rayîra demokrasîyî abikera û wina qedîna: “Eke ma pîya xebatêy xo bdomnêy se ma do hewna zaf serkewtiş bigerêy û verbê demokrasîyî bişerêy û qedera şaran bibedilnêy. Çimkî hetkarîya elewîyan na weçînayişî de zaf zaf o.”
‘Semedê cuyayişeke newe HDP’
Namzet Dursun Yildiz zî bi seran têkoşîna elewîyan de cayê xo sîyaseta kurdan de giroto û xebatêy xo weş kerdo. Sewasî ra rêza sifteyin de ca geno. Yildiz Serra 2009 de Sultangazîya Stenbolî de BDPî ra bibi endamê şaredareyî.
Yildizî zî ard ziwan ke no weçînayiş qedera zaf çîyan do belî bikero û wina dewam kerd: “No weçînayişİî de do Tirkîya bireso aştî, aramî û demokrasîyî. Verbê dîktatoreya AKP do serkewtişeke aştî û çareserî bidest bifîno.”
Yilmazî ard ziwan ke no weçînayişî de elewîy zaf fikiryayê û biryara xo dayê ke HDPî ra hetkarî bikerêy û wina qedîna: “Elewîy pey fikiryayişê xo bê kilîta xo danêy HDPî. Armanca elewîyan him xo, bawerîyê xo û partîya xo û şarêy xo bido cuyayişî yo.”
DÎHA/STENBOL
Turan: Şar do şert û mercan bibedilno
Namzedê wekîlê Edeneya HDPî Ridvan Turan, bi têkoşîn û biryara şaran problemêy sîyasî, aborî, aştî û aramîyî do bêro çareserkerdiş.
Turanî bedewamîya qisey xo de qala derd û koçkerdişê şarêy ke koçê Çûkûrovayî kerdêy kerd û vat: “Tîya de kurd, tirk, ereb û zaf şarêy bînan ra merdimîy cuyenêy û bi giranî karê citkareyî kenêy. Ma zanêy ke zaf derd û kulê şarêy tîyayî esto. Heta ke destê ma ra bêro ma do hal bikerê ra çareyan bigeyrê çimkî tîya paştîya şaran o.”
‘Pergala ke şîlî ra simer îthal biko’
Dergeya qisey xo de Tûranî balt ant kerdişêy pergala hukûmatî ke simer Şîlî ra îthal keno û wina dewam kerd: “Çûkûrovayî de qey simer nêmendbi ke hukûmat Şîlî ra simer îthal kerd. Wa heme kes weş biewno ke AKP bi mezgeke senî Tirkîyayî rayîra bena. Ma xala peynî de heme probleman weş zanêy. Çimkî ma semedê înan ra çare bivînê ra têkoşînî de yê. Şar îsyan keno. Citkar perîşan kerdêy û roj bi roj citkarî mireno.”
Dergeya qisekerdişê xo de bala şaran ant kedkar, karker û karmendan ser ke keda înan bi temamî nînodayiş û wina qedîna: “Çûkûrovayî de zaf xebatkarêy citkarî ke demserrine xebat kenêy estêy û ewleheya weşeya kesê zî çîno. Xizanî pêrîşanî de cuyenêy û no zî qîm nêkeno rayîran de rastê qezayan yenêy û cuyayişê xo vinî kenêy û birîndar benêy. No pergala Tirkîyayî de kekdar û karkerêy bîn ke karê giran de xebat kenêy zî raştê qetilkerdişê karî yenêy. Hureynîya ke AKP rewşa xebatkaran weş bikero ra mafê dewlemendan geş kerd û ê înan xetimna. No nîno qebûlkerdiş.”