Teşebusê derbe ra dima bi deshezaran karker û kedkarî bi Qerarnameyê Hukmê Qanûnî (KHK) karî ra ameyî îxraçkerdiş. Hemserekê Odeya Tabîban yê Amedî Dr. Yakup Altaş û Nuştoxa Hîkayeyan Pelîn Buzluke zî nînan ra yî. Altaş û Buzluke bi KHKyo tewr peyên ke ame weşênayîş îxraç bîyî. Babete ser o Dr. Yakup Altaş û Pelîn Buzluke qisey kerdî.
Altaşî va ‘teşebusê derbe ra dima vera muxalîfan de teda, tewqîfkerdiş û îxraçkerdişî dîyayî destpêkerdiş’ û wina domna: “Ma heta nika tim aştî û kede pawit. Seba ke ma vera şerî de bîy, ma yenî îxraçkerdiş. Ma her ca de vera polîtîkayanê hukmatî de reaksîyonê xo nîşan da. Labelê ma vera nînan de bêtehamulîya hukmatî reyde rî bi rî mendî.”
Wazenî çinî bikerî
Altaşî dewamê qiseykerdişê xo de va ‘ma bi hawayo bêmuhakeme û neheq heqanê xo ra ameyî mehrûmkerdiş’ û wina dewam kerd: “Hedefê înan o bî ke têkoşînê ma pasîfîze bikerî û dima ra zî çin bikerî. Eşkenî meslegê ma destê ma ra bigirî, labelê doktorî tena dezgehan de nîna viraştiş, ma do têkoşînê xo bidomnî. Îxraçkerdişî îxlalê heqê merdiman î, ma do heta peynî heqê xo bigêrî. Ma do muracatê Mehkemeya Qanûno Bingeyî bikerî, eke netîce nêvejîyo, ma do muracatê Mehkemeya Heqê Merdiman ya Ewropa (AÎHM) zî bikerî.
Nane yan zî rûmet
Altaşî va ‘bi KHKyanê peyênan birayê mi Îsmaîl Altaş zî karê xo yê doktorî ra ame îxraçkerdiş’ û wina dewam kerd: “Dormeyê ma de cinî û camêrdê ke pîya ameyî îxraçkerdiş zî estî. Hukmat ma ser de tercîhê nane yan zî rûmetî ferz keno. Birayê mi nika nêweşxaneyêko taybet de xebetîyeno û têkoşînê xo domneno. Hukmat wazeno împaratorîya tersî awan bikero û bi no hawa mesaj bido şarî. ”
‘Mi ti suc nêkerdo’
Nuştoxa hîkayeyan Pelîn Buzluka ke bi KHKyo peyên karê xo ra ameye îxraçkerdiş zî wina va: “Mi seba ke derheqê kesê ke ameybî îxraçkerdiş de ser hesabê xo yê Twîtterî ra çîyan pare kerdêne, ez ameya îxraçkerdiş. Nika ez hêrsbîyaye ya; xora seba têkoşînî hêrs lazim o. Ez zana ke mi ti suc nêkerdo û tena mi waşt ke ez heq û azadîya xo bigîra.” Buzluke dîyar kerd ke ‘xirabî zaf rew aver şona’ û va, “Ganî ma waranê neweyî yê têkoşînî aver berî.”
Ma dewam kenî
Hemsereka SESî ya Şûbeya Amedî Gonul Adibellîye zî derheqê îxraçbîyayîşan de va ‘teşebusê derbe ra dima her çiqas ke ti sebeb orte de çinêbî zî ma karê xo ra ameyî eştiş. Adibellîye vist vîrî ke nika embazê ci mîyanê zehmetîyan de cuyenî û wina domna: “Kesê ke ameyî îxraçkerdiş, heqê înan yê sosyalî zî destê înan ra ameyî girewtiş. Sendîkaya ma no het de heta ke dest ra ameye, piştî daye embazan. Embazê ma zî fek têkoşînê xo ra veranêdayî û nika sewbîna cayan de xebetîyenî. Tayînan kafe akerd, tayê zî kerge û birinc roşenî. Ê se bikerî zî nêşênî ma bitersnî.”
Lazimîya aştî û azadî esta
Adibellîye va ‘ma bi ruhê piştîdayîşêyewbînan vera îxraçkerdişan de vindenî’ û wina dewam kerde: “Kura de beno wa bibo, ma do têkoşînê xo bidomnî û seba domnayîşê têkoşînî rayîranê alternatîfan bivînî. Ma do vera îxraçkerdişan de bêveng nêmanî. Lazimîya nê welatî bi aştî û azadî esta. Ma wazenî ke wa neheqî û bêedaletî orte ra bêro wedarnayîş.”
AMED