Bi nizdîbîyayîşê referandûmî kampanyaya nê zî her ke şona hîra bena. Cinîyê HDPyî ke Sêrt de xebata referandûmî meşnenî, keye bi keye, dewe bi dewe, ziqaq bi ziqaq gêrenî û sebebê vatişê nê şarî ra vanî. Bajaro ke giranîya ci vano nê, her kes bi sebebêko cîya vano nê. Tayê vera sîstemê kesêk de vanî nê, tayê seba ke prosesê şerî biqedîyo vanî nê. Babete ser o Îdarekara HDPyî ya Sêrtî Ayten Elçîçeke qisey kerde.
Bi hezaran sebebî estî
Elçîçeke va ‘ma bi wesayîtê weçînayîşî taxe bi taxe, ziqaq bi ziqaq, keye bi keye gêrenî’ û wina domnaye: “Ma esnafan zîyaret kenî, sûke û bazaran gêrenî. Ma seba çi vanî nê, şarê xo ra vanî. Merdimî prosesî baş taqîp kenî û cok ra ge-ge qet lazimî bi vatişê ma nêmaneno. Merdimî zanî ke eke vajî ya, do hîna zaf zulm, teda bivînî. Cok ra her kes zaf qerardar o û vano nê.”
Nê ezber kenî
Elçîçeke dewamê qiseykerdişê xo de bale ante yê ke wendiş û nuştişê înan çin o ser û wina dewam kerde: “Bitaybetî ma raştê kesê ke wendiş û nuştişê înan qet çin o, yenî û nê kesî hewl danî nê ezber bikerî. No zî xebatan de hêz dano ma. Nînan ra bitaybetî dayîkê extîyarî nika ra dest bi ezberkerdişî kerdî zî. Wexto ke ma şonî taxan, domanî senî ke vengê anonsî eşnawenî, vejîyenî teber. Ge-ge ma eleqeyê şarî ver nêşênî wesayîtî ra peya bibî. Tilîlîya cinîyan, çepikê înan û coşê înan hêzêko gird dano ma.”
Ma do bi tesilî qezenc bikerî
Elçîçeke peynîya qiseykerdişê xo de va ‘Sêrt de şarê cîya-cîyayî cuyenî’ û qiseykerdişê xo wina qedênaye: “Erebî zî, kurdî zî û tirkî zî vanî nê. Wesayîtê ma çend reyan bi sebebanê kêfî hetê hêzê dewlete ra ameyî vindarnayîş. Hewl danî xebatanê ma asteng bikerî, labelê ma astengîyan nêşinasnenî. Ma do xebatanê xo bidomnî û heme cayan de vajî nê. Ma do referandûm de bi tesilî qezenç bikerî.”
ŞÛJIN/SÊRT