Esnafê bajarê Dîlokî derheqê referandûmî de qisey kerdî û ardî ziwan ke bawerîya înan bi Erdoganî çin a; çimkî Erdoganî heta nika tim kurdan xapênayo.
Bajarê Dîlokî hetê xelqkerdiş û tîcaretî de Tirkîya de rêza 6. de yo. Labelê polîtîkayanê AKPyî ver her ke şono krîzê ekonomî gird beno û esnafê Dîlokî krîzê ekonomî ver ameyî dûştê padayîşê dikananê xo. Esnafê Dîlokî referandûmî ser o qisey kerdî û fikrê xo aşkere kerdî.Esnafan ra Sabrî Behçetî va ‘eke no krîz wina dewam bikero, do nîmeyê esnafanê Dîlokî dikananê xo padî’ û wina domna: “Hetêk de krîzê ekonomî esto, heto bîn de Serekkomar Erdogan kewto pey serekî. Homa şahid o ke ez do vaja nê. Yê ke referandûm de vajî ya, do mexdur bibî. Krîzêko gird û bêkarîyêka girde esta. Ganî nê probleman rê çareserîyêk bêro dîyayîş. Ma do seba çareserîya problemê kurd û krîzê ekonomî vajî nê.”
Seba huzirî 'Nê'
Osman Akdoganî va ‘Erdogan welatî ver bi şerî beno’ û wina dewam kerd: “Ez OHALî rê vana nê. Peynîya Erdoganî zî do sey Sedamî bibo. Lajê feqîran mirenî û ti wazenî Serekî bîyarî. Ma do to û embazanê to ra vajî nê. Vatişê nê, do seba Tirkîya ameyoxêka newe bîyaro.”
Esnafan ra Mesut Garsî zî fikrê xo aşkere kerd û wina va: “Ez nêwazena welat tena hetê kesêk ra bêro îdarekerdiş û cok ra ez vana nê. 14 serranê peyênan de çîyêk nêbedilîya. Tena qetlîyam, înfaz û rijîyayîşî bîyî. Nika Dîlok kerdî merkezê DAIŞî. Cok ra ma do vajî nê.”
Ma nêwazenî
Esnafan ra Murat Şencîyî zî va ‘Dîlok bajarêko qedîm yê Kurdistanî yo’ û wina va: “Her ke şono krîzê ekonomî herême de gird beno. Rejîmanê şexsî de zulm û îşkence esto. Ma seba demokrasî vanî nê. Bawerîya ma bi Erdoganî çin a. Ez veng dana her kesî, seba ke ma bişinbî pîya bicuyî, ganî ma vajî nê.”
OMER ÎKE / ANF / ANTEP