Netîceyê referandûmo ke 16ê Nîsan de ame viraştiş rê îtîrazî nêqedîyenî. Nê îtîrazan ra yewe zî Kongreya Îslamo Demokratîk (DÎK) ra ame. Endama Şuraya DÎKî Dîlan Aydine derheqê netîceyê referandûmî de qisey kerde.
Aydine va ‘wexto ke merdim weçînayîşê verênan ra ewnîyeno, vîneno ke îqtîdaran heta nika ti sozê ke dayo, nêtepiştî’ û wina dewam kerde: “Wexto ke merdim bajarê ke ameyî rijnayîş û veşnayîş ra ewnîyeno, netîceyo ke ameyo girewtiş, serkewtişêko gird o. Referandûm de cewabêko gird ame dayîş. Îqtîdar wazeno ke heqê cuyayîşî û rûmetî orte ra wedarno. Wexto ke merdim agêreno û ewnîyeno, bajarê ke ameyî rijnayîş vîneno. Ma vînenî ke şar çadiran de cuyeno û zehmetîyanê girdan anceno.”
Îtîrazî nînê qebulkerdiş
Aydine dewamê qiseykerdişê xo de dîyar kerde ke cayê ke tede qedexe ame îlankerdiş, ê cayan de hêrişê girdî ameyî kerdiş û qetlîyamî virazîyayî. Aydine bale ante îradeya şarî ser û wina va: “Ti kes nêşêno xo bierzo vernîya îradeya şarî. No netîce zî nêşêno bikewo vernîya îradeya şarî. Heto bîn ra xebatê referandûmî eynî şert û mercan de nêameyî kerdiş. AGÎT û sewbîna dezgeyê mîyanneteweyî zî hîle û kayanê referandûmî kerd rapor. Labelê her çiqas ke wina yo zî îtîrazî nînî qebulkerdiş. Netîce goreyê menfîetî îqtîdarî ame vetiş.”
Wezîfeyo gird
Aydine peynîya qiseykerdişê xo de va AKP bi îstîsmarîya dînî îqtîdar de yo û wina qedênaye: “Raştîya xo de bi serran o ke wina yo. Dewletî tarîx de zî bi xebetnayîşê dînî bîyî îqtîdar. Labelê ti eleqeyê dewletan bi îslamî reyde çinêbîyo. Çiqas çîyê ke dîn de çin î, heme bin nameyê dînî de û vera merdiman de yenî xebetnayîş. No het de wezîfeyêko gird keweno milê DÎKî ser. Ganî ma hîna zaf bixebetyî û raştîyan şarî ra vajî.”
ŞÛJIN/AMED