16ê Nîsane de referandûmêk ame viraştiş û netîceyê referandûmî de bi hîle û kayan se ra 51 ya vejîya û se ra 49 zî nê vejîya. Prosesê referandûmî û netîceyê referandûmî de zext û tedayê ke hetê hukmatî ra ameyî kerdiş hetê her kesî ra ameyî dîyayîş.Babete ser o Ertugrul Gunayo ke 6 serran hukmatê AKPyî de Wezîrtîya Turîzm û Kultirî kerd, qisey kerd û vînayîşê xo ard ziwan. Gunayî dîyar kerd ke netîceyê referandûmî têkşîyayîşêk o û ard ziwan ke şîroveyê ke sey ‘AKP bajaranê kurdan de piştîdayîşê kurdan girewto’ zî manîpulekerdişê raştîyan o.
YSK çinî hesibna
Gunayî dewamê qiseykerdişê xo de vist vîrî ke ‘no referandûm sey referandûmê ke serrê 1961 û 1982 de şert û mercanê tewr zehmetinan de ameyo viraştiş û wina domna: “ YSKyî qanûnanê xo çinî hesibna; cok ra netîce bêhuqûqî yê û ser weçînayîşîde şaîbe viraşto.”
Mudaxale kerdî
Gunayî dewamê qiseykerdişê xo de bale ant nê vejîyayîşê bajaranê girdan yê sey Stenbol, Anqara, Îzmîr û Amed ser û qiseykerdişê xo rê wina dewam kerd: “Her çiqas ke şert û mercê îstîsnayî estbîy zî bajarê sey Stenbol, Anqara, Edene Amed û merkezê gird û muhîman de bedilnayîşê qanûno bingeyî ame redkerdiş û no zî bawerîya şarî ya demokrasî nîşan da. Nê cayanê girdan de şeklê îdareyêko winasî ame redkerdiş, badê ke bajaranê girdan de bedilnayîşê qanûno bingeyî ame redkerdiş, caardişê bedilnayîşê qanûno bingeyî zî êdî qet mumkin nêaseno.”
Gunayî da zanayîş ke ‘tewr zêde bajaranê kurdan de şaîbe virazîya’ û wina va: “Derheqê netîceyê weçînayîşî de sere de TRT û heme televîzyonan de, reyna Ajansê Anadolu yê îqtîdarî de îdareyê fehmî estbî. Tabî îdareyê fehmî tewr zêde Başûrrojawanê Tirkîya de virazîya. Başûrrojawan de welatîyê ma tewr zêde vatî nê û demokrasî pawitî. Wexto ke no netîce vejîya ganî merdim xo vîra nêkero ke nê prosesî de hemserek û xeylê parlamenterê HDPyî tewqîfkerde bîy. Heto bîn ra tewr zêde mudaxale bajaranê herême de bî. Bi mudaxaleyan hewl dayî sey ke herême de reyî zêde bîyî, nîşan bidî. No zî bêrezîya vera îradeya şarî ya.”Gunayî peynîya qiseykerdişê xo de bale ant qebulkerdişê YSKyî yê pusulayê bêmoran ser û wina qedêna: “Netîceyê referandûmî seba îqtîdarî têkşîyayîş o. Pêroyîya reyê AKP û MHPyî 1ê Teşrîna vêrena 2015 de se ra 61î ra zêde bî, la ewro bi reyê BBPyî zî tede binê se ra 51î de yo.
DÎHABER/STENBOL