Hemsereka Kongreya Komelê Demokratîke (KCD) Leyla Guvene zî derheqê referandûmî de qisey kerde û vînayîşê xo arde ziwan. Guvene va ‘weçînayîşê ke wextê AKPyî de ameyî viraştiş, çarçeweya ewleyîye de nînî viraştiş û dîyar kerde ke her çiqas ke şert û mercê OHALî estbîy zî şarê kurd şî sindoqî ser û reya xo xebetna.
Guvene dewamê qiseykerdişê xo de wina va: “Netîceyo ke Kurdistan de vejîya orte zaf muhîm o. Cayê ke Xoserîya Demokraktîke tede ameybî îlankerdiş de se ra 70-80 reyê nê vejîyayî. Reyê bînî zî yê kurdan nêbî, yê hêzê dewlete bî. Cok ra ma minetdarê şarê xo yî. Netîceyo ke sindoqan ra vejîya, derheqê problemê kurdî de her kesî yewna rey dayo fikirîyayîş. Şar wayîrê îradeya xo vejîya. Seba tecrîdo ke Birêz Ocalanî ser ro wedarîyo, problemê kurd çareser bibo û grevê vêşanîye biqedîyo netîceyêko muhîm vejîyayo orte.”
Ganî problemî çareser bikero
Guvene bale ante problemê kurdî ser û wina va: “Hema zî problemo tewr gird problemê kurdî yo. No referandûm de ma dî ke bi qoricî û hetgiranê xo hewl dayî ke mîtîngan bivirazî, la bitaybetî Amed û Şirnex de derbêka girde werdî. Îdîa kerdênê ke kurdî piştî danî înan û pawitênê ke do kurdî vajî ya. Labelê netîce sey lekmatêk ginayî rîyê AKPyî ro. AKP ewro îqtîdar de yo labelê heta ke problemê kurdî çareser nêkero, nêşêno sîyasetêko serkewte bimeşno. Merkezê heme probleman de problemê kurdî esto. Ganî AKP goreyê ci game bierzo.”
Îttîfaqê AKP û MHPyî têk şî
Guvene va ‘îttîfaqê AKP û MHPyî têk şî’ û wina domnaye: “Eke ti bajaranê girdan de vinî bikerî, o yeno manaya ke to heme welatî de vinî kerdo. Ganî AKP bivîno ke no netîce netîceyêko mende nîyo. Verê cû AKPyî tena sereyê xo se ra 50 reyî girewtbî, labelê nika îttîfaqê AKP û MHPyî bi zorî netîceyêko winasî girewt. Îtîrazê CHP û HDPyî zî estî. Kartê weçînitoxan yê ke bêmor bîy, hetê Heyetê Weçînayîşî yê Berzî (YSK) ra ameyî qebul kerdiş, no zî yeno manaya têkşîyayîşî. Welat bî di parçe. Têkoşînê ma do bidomîyo. Bawerîya ma zaf bi AKPyî nêmenda. Têkoşînê ma bi AKPyî dest pênêkerd û bi AKPyî zî nêqedîyeno. Têkoşînê ma têkoşînê merdimîye yo.”
DÎHABER / AMED