Rojnameyê Newepel ke bi safî kirmanckî yo û 15ê Adara 2011î ra na het weşan keno, padîyeno. Hûmara 100. ra dima Newepel rîwalê bêîmkanîyan padîyeno.
Newepel ke heta hûmara 50îne 15 rojan de reyêk vejîya, hûmara 50în ra dima aşmeke reyêk vejîya.
Goreyê zonayîşê ke Newepelî nuşteyê edîtorîya hûmara 100. de beyan kerdî, 100 hûmaranê Newepelî de nuşteyê 361 kesan weşanîyayê. 250 ra vêşêr kesan reya verêne Newepel de dest bi nuştiş kerdo, bi seyan merdimî zî Newepelî dir musayî wendişê kirdkî.
Rolê wendegehî kaykerd
Herzewbîn 81 sanikî, 137 meselayî, 67 roportajî, 32 kayê domanan, 49 fiqrayî, 53 deyîrî, 6 nuşteyê cigêrayişî, 34 mesajî, 42 tarîfê werdî û gelêk nuşteyê bînî yê sey mewlidî, efsaneyî, çibenokî, mamikî, lorîgî, îdyomî, vateyê verênan, miqlatikî, lezvateyî, karîkatur û fotografî Newepelî de weşanîyayê.
Tenya Bakûrê Kurdistan de nê, herzewbîn Başûrê Kurdistan de, Îngilîstan, Kanada, Ewrûpa û Qahîre de zî aboneyê rojnameyî estê.”
Rojnameyê Newepel ke rojnameyê verên yê kirmanckî yo, derheqê wendiş û nuştişê kirmanckî de rolê wendegehî kay kerd. Edîtorê rojnameyî Roşan Lezgîn emegêko gird da rojnameyî.
Xeynê Newepelî rojnameyo ke bi kirmanckî vejîyeno, çin o. Çiheyf ke Newepel zî hûmara 100. ra dima, bi sebebê nêbîyayîşê îmkanan padîyeno.
JIYAN TV bi KHK padîya
Televîzyonê verên yê kirmancan JIYAN TV ke Newrozê 2016î de destpê weşanî kerd û herêmanê Dêrsim, Sêwereg, Gimgim, Çewlîg û Amed ra bernameyan viraştbi zî, çend aşman ra dima 29ê Êlule 2016î de çarçoveyê Qerarnameyê Hukmê Qanûnî (KHK) ame padayîş.
NAVENDÊ XEBERAN