Çewlîg de serrê 2010î ra heta na het jew nêweşxaneyê newî yê dewlet viraziyeno. La nêweşxane 5 serriyo nêqediyeno. Îxaleyê nêweşxane hetê TOKÎ û hetê firmaya parlamenterê AKP ê Amed’î Galîp Ensarîoglu ra virazyeno. Goreyê plansazey, nêweşxane ganî-gerek serra 2013î de biqediyayî ba, la rexmo ke, 5 serrî viyertî ra, hama nêweşxane binate de çiniyo.
Parlamenter Ozsoy ra verniyaz
Parlamenterê HDP ê Çewlîg Hişyar Ozsoy’î bi yo verniyazpers mesele kirêşt meclîsê tirkiye. Ozsoy ard ziwan ke, şertê îxaleyî nêameyî ca, la rexmê nayî, Weziriyê Weşî ceza nêda firmayê Ensarîoglu. Ozsoy va: No zî miyejnan-damusneno ke, Wezîrtiyê Weşî, Walitiyê Çewlîg, TOKÎ û hikumetê AKP Ensarîoglu pawenê.
Ozsoy waşte ke Wezîrê Weşî Mehmet Muezzinoglu cewabê nê persan bido:
* Nêweşxane wextê xo de nêqediya, no ridra firmayê Ensarîoglu rê cipersayiş biyo a?
* Tarixê teslîm ser ra, di serrî û nîm viyertî ra, qê gurê na fîrma nêgeriya û yona fîrma rê dewr nêbi?
* Waharê-wayirê fîrma parlementerê AKP Mehmet Galîp Ensarîoglu yo, no rid ra ceza na firma nediyeno?
* Wezîriyê şima semedê nêqedînayişê nêweşxane û cezadayişê na firma de, yo gure kerd?
* Viraştişê nêweşxane çi wext qediyeno û xizmet rê abeno-beno a?
Heta bîn ra gurekarê ke nêweşxane înşa kenê, aşma Adar de, semedo ke menganî-meaşê xo nêgirotî nûmayişê viradayişê karî ronaybî.
ÇEWLIG