Emserr çar parçe yê Kurdistan û teberê welatî de Newroz zaf cîya bi. Newroza emserr sey Newroza 1990’yî bi. O caxî zî Newroz hetê dewleta tirk ra amêbî qedexe kerdiş. Ala û rengê şarê kurdî qedexe bî.
La şarê kurd reyna vejîya bi meydan. Pê (bi) ala û rengê xo Newroz pîroz kerd bi. Newroz açarnaybî têkoşîna xoverdayîş û azadî. Şirnex de pîrozkerdişe Newroz 1992 de 100 kes zêdetir şehîd amêbî dayîş. Nisêbîn, Cizîra Botan pêro cayê Kurdistan hinabi. Şarê kurd pê pîrozkerdişê Newroz herîya tirsê ser xo ra eşt. Şarê kurd bi şarê xoverdayîş û şarê egîd. Dima ra Newroz bi malê pêronê dinya. Amed de her ser bi mîlyonan Kurd û şarê bîn beşdarê Newroz benê. La vateyê Newroza emserr zî sey vateyê Newroza 1990’yî yo.
Nika zî Bakurê Kurdistanî de qedexe û zilmêk zaf gird esto. La reyna şarê kurd sey rihê 1990’yî vejîya meydanan û Newroz pîroz kerd. Sey Bakurê Kurdistan, Almanya de zî dewleta Alman ala û sembolanê şarê kurd qedexe kerd. La şarê kurd goş nêda qedexe û no qedexe veng/tol vete. Roja 18ê Adare de şar pê reng û vengê xo vejîya meydanan û bajarê Almanya Frankfurt lerzna. Bi des hezarî kurdî û dostê ci hina Newroza xo pîroz kerd. Hemverê coş û têkoşînê şarê kurdî de, dewleta tirk bêjîya û fetisîya. Qerînî ser qerînî kena. Vana ‘Ey Almanya senî hina beno. Wa dewleta tirk û AKP û hevalê ayê bi teqê.’ Şarê rayîra Mazlum, Zekîye, Rehşan, Berîvan û Ronahî înan taqîp kenî. Ayê ke Newroz kerd Newroz esil eyê. Şarê Kurd zî xeyalê înan ano ca. Pê no rih û cesaratî Newroz pîroz kerd.
Ez zî Newroza keyna û lajan, qij û pîlan, cinî û camerdanê kurd yê egîdan pîroz kena. Mi zî pê no rih û cesaretî yew şîîr û deyîr nuşt, bi şima ra bare kena:
Oy Newroz
Deşt û bajaran do
Tarî û zulmat o.
Koyan û dewan do
Birqê birqê adir o
Oy Newroz
Oy Newroz
Govendê keyna û lajan o
Govendê qij û pîlan o
Govendê cinî û camerdan o
Govendê kurdê egîdan o
Adirê gelî û koyan
Resayo deşt û bajaran
Bîyo req reqê şûr û gurzan
Vila bîyo mezgê Dehaqan
Oy Newroz
Oy Newroz
Govendê keyna û lajan o
Govendê qij û pîlan o
Govendê cinî û comerdan o
Govendê kurdê egîdan o
Xurre xurre aw û çeman
Reng rengê gul û vilan
Şadî û zerweşîya keynan
Alê azadî ha meydanan
Oy Newroz
Oy Newroz
Govendê keyna û lajan o
Govendê qij û pîlan o
Govendê cinî û camerdan o
Govendê kurdê egîdan o