Ver ra naye vajîne: Newroza emserrene de teqetê dewlete cayê xo de vinetî, meselade girse nêvejiye. Cop û qazê xo teqetanê dewleta tirkî verva însanê kurdî karnêardî.

Hata emserr sermiyanan û teqetanê dewleta tirk ke rengê kurdan diyenê, qayde kewtenê. Domon, kokim cenî û camerdî ceranêkerdenê, teroro rutûrupal vaydenê.
Se ke hata nî serranê peyenan vatenê “zonê kurdan çîno qart-qurt esto” nika endî jart-jurt nêkenê, estbiyayena zonê kurdan qebul kenê sermiyanê dewleta kolonyalîste. Hama hona zî na heqa kurdan ci nêda.
Hata par zî Newroze kerde qedexe. La qomê kurdî desê qedexeyî riznayî, par zî Newroza xo kerde bimbarek. Dewleta AKP hata ewro na semed ra leborîna xo nêwasta.
Newroza emserrene de ma dî ke, dewleta terorîste ke teqetê xo yê zulmkarî peyser guretî, kurdî bi renganê xo û bi haştiye Newroze kenê bimbarek.
Tabî na nêna o manke, dewleta terorîste biya ramanî, kurdî famkerdê. Çiyo niyanen çîno. Kurdan da pêro, bedel da, nî heqê xo guretî. Jû dewleta ke rîwalê zulmê seserran ra kurdan leborîne xo nêwasta, famkerdene ra dûr ya.
Samîmiyetê dewleta tirkî îta de beno eskera. Hatake na dewleta gonewere qomê kurdî ra leborîna xo nêwazo, cirê tîvar nêbeno.  Na rîwal ra kurdî na dem de zî gune na qese “Osmanî de kayî nêqedînê” biyarê xo vîrî. Waxtoke seweta haştiya gureyayî, gune hayîg û hesar vinderê.
Tarîx de xêle dugelan de numuneyî estê. Hukumatê Srî Lanka gerîllayanê Tamîl de Oslo de qesey kerd, peyniye de aynî dewlete dewadewa 50hezar însanê tamîlî qetil kerdî, dîna vêngê xo nêvet. Îsraîl û Fîlîstîn 20 serrîyo jûvîn de qesey kenê, hama vireniya gonî hona zî nêceriya. Hata na roze gamêke ke seweta haştiye amê estene, kurdan estê. Hama dewleta terorîste teyna halkerdena mesela ra qesey kena, heqanê kurdan sero çekuye nêvana.
Rayverê qomê kurdî Abdullah Ocalan heşto peye 21ê Adare Newroza Amed de onca mesajê xo yê haştiye dayî. Ocalan kilmek vat ke ”naye ra tepiya çekî nê, sîyaset vejîno ver. Waxt amo, gerîllayî oncînê teverê bakurê Kurdistanî. Na nêna o maneke, qewxa caverdîna, qewxade bîne dest kena ci.”
Seweta haştiye gama virene onca hetê kurdan ra erjiye. Naye ra tepiya dewleta terorîste seweta haştiye sene gaman erzena, rozanê verva ma de beno zelal. Hen omid ken ke na gurenayîsê qomê kurdî seweta haştiye, hetê dewleta terorîste ra seweta gonî deverdayene jê firsedî nêvînîno.
Serokwezîro tirk vano “Newroze de desmala ma darde nêkerda, no çiyo rind niyo.” Ez bara xorê van, şiya na desmale de xêle terteleyî biyê, hatake dewleta tirkî na semed ra leborîna xo nêwasta, na desmale gune caye de darde nêbo.