Prof. Dr. Mustafa Şenero ke bi Qerarnameyê Hukmê Qanûnî wezîfeyê xo ra amebî îxraçkerdiş û Prof. Dr. Atîlla Guneyî derheqê referandûmî de qisey kerdî.Guneyî va ‘unîversîteyî tena cayê xelqkerdişê zanayîşê komelkî nîyo, cayê xelqkerdişê fikrê ke îqtîdarî xo ser ro meşrû kenî yî zî’ û wina domna: “Ez bedilnayîşê qanûno bingeyî ra tena bedilnayîşê rejîmî yan zî sîstemê nîm serekî nêewnîyena. AKP wazena cayê xo bigira bin temînatî. Goreyê mi partîyê ke vanî ‘ya’, seba ke bêro qebulkerdiş, çi destê înan ra bêro do bikerî. Eke şert û mercê her di hetan sey yewbînan bo, o wext do hetê ‘nê’yî qezenç bikero. Mîyanê AKPyî de daxî yê ke nê sîstemî qebul nêkenî û ti ra etiryenî, estî. Her di hetî zî do kampanyayê xo kurdan ser de bimeşnî. Ez bi xo zî vana nê.”
Amadekarî kenî
Prof. Dr. Şenerî zî wina va: “Goreyê mi referandûm do demokratîke nêbo. Merdimî Ewropa ra bi hawayo etiryaye Tirkîya temaşe kenî. Raştîya xo de ti kes bedilnayîşê qanûno bingeyî de îkna nêbîyo. Hetta hetê ke nizdîyê îqtîdar î, ê zî îkna nêbîyî. Cepheyê ‘nê’yî nika hîn bihêz o. Eke nê bivejîyo, îqtîdar do bikewo tengasî û xitimîyayîşêko gird. Cok ra heta ke destê înan ra bêro seba ke ‘ya’ bivejîyo, do bixebetyî. Ez zî vana nê û bawerîya mi bi bedilîyayîşî esta; bi ‘nê’yêk daxî zaf çîyî bedilyenî.”
DÎHABER/MERSÎN