Domanê qijkekî bêguna û bêmobal taxan de, verê keyeyan de,virana maye û pîyan de ênê kîştenê. Pîzeyê mayan de masûmê pakî ênê qetl kerdenê. Xort û azebî bi teverê qanûnî ênê qir kerdenê. Rojnamevanî, roşinvîrî, zanayî bêsual ênê tepiştenê. Sur de, Cizîr de,Nisebîn de,Derik de şaro sîvîl,her roj bi tanq û topan êno qirkerdenê. Keyeyî, wayîranê înan rê bîyê mezele.
Cenazeyî bi rojan, bi hewteyan nênê girewtenê. Meyîtî, hetê maye û pîyan ra nênê wedardayenê. Birîndarî, nêeşkenê xo biresnê nêweşxaneyan û birînanê sivikan ver gan(can) danê. Top, tanq û çekê giranî qij û pîl, cinî-camêrd nas nêkenê û her qilawetîye rê adir varnenê.
Nika dûştê nê zulmî de Kurdî peyser game erzenê? Cinî, nê zulmî ver destanê xo danê girê û sîya girêdanê? Sosyalîstî, meterîsan ra remenê û teslîmê dewleta AKP benê? Qizilbaşî/Elawîyî tersan ver Erdoğanî ver de ênê çok? Nê, êdî mûmkîna naye çîn a. Ewro tekoşîna Kurdan nê pêro hêzî ardê têlewe û xeta demokrasî kerda xurte. Pêroyê maxdûr û mazlûman na xete xo rê xelasîye dîya û bi na bawerîye kewtê rayîrê azadîye.
Dûştê na xeta demokrasî û merdimahîye de dewlete bi tecrubeyê faşîzanîya xo ya seserrîye êrîş kena. Xoverdayîşê demokrasî û azadîye çiqas ke gurr bo, faşîzm zî hande beno har. Kurdan, bi maxdurîyetê seserran, bi tecrubeyê binkewtişê xoverdayîş û serêwedartişanê binkewteyîyan hafizayêda xurte awan kerda û tarîxê xo ra dersê mûhîmî girewtê. Bi na hafiza û bi nê netîceyan, ewro Rojhilato Mîyanên de nifteyê berê azadîye Kurdan dest de yo. No nifte têna Kurdan rê berê azadîye anêkeno. Her şar, her kome,her bawerîye û her ziwan baş vîneno ke no ber berê xêrîyo û haştîye ser abeno.
Êdî Kurdî yew ciwîyayîşê neweyî nîşan danê û seba naye zî felsefe ra bigê heta hêza leşkerîye,her het ra bingeyo de miqerem ronayo. Naye ra zî êdî her Kurd verê lûlîya tifangî de yo. Mabenê Rojhilatê Mîyanenî de çîyê neweyî ra qalkerdiş nêşona weşê tîran û qralan. Her Kurd êdî dişmen êno hesibnayêne. Şer eşkera êno kerdêne û dewlete televîzyon,radio û rojnameyanê xo bi dişmentîya Kurdan neqeşnena. Qerar ameyo dayîş,na derheq de şikê kesî pê çîn o. Misteheqê Kurd û Kurdîstan ra qal kerdêne,merdene ya.
Tabî nê, Başurê Kurdîstanî de benê la, dewlete têna başur de nê, her het de kena ke Kurdan ra rayîr bibirno. Cenewre nînan ra yew nimûne ya. Erdoğan û Davutoğlu her roj tûrikê xo erzenê hermeyê xo ser û welat bi welat gêrenê. Her ca de, her welat de Kurdan ser bazarîye kenê. Êdî Kurdê Bakurî têna dişmen nîyê. Kamcî welat de Kurdî estê pêroyînan rê dişmentîye kenê û Kurd û Kurdîtîye ser kotî de ke yew çîyê bibo xo resnenê ci û alozîye fînê kar.
Nika ewro ra dima se beno..! No zulim, na zulimkarîye, na neheqîye do çiqas dewam bikero..! Qederê Kurdan, do ewro ra dima bibo sey Şêx Sêîdî, sey Seyîd Rizayî,sey Alîşêr û Zarîfeye? Êdî hande asan nîyo no kar. Çunke no xoverdayîş êdî têna ê xelasîya Kurdan nîyo, her şar, her kome, her bawerîye, her reng û her veng zereyê ney xoverdayîşî de xo rê ca vîneno.
Wisar zaf dûrî nîyo. Çend aşmanê bînî ma do bivînê… Laserê çeman, mijê koyan, rengînîya dêştan, buşkî dayena daran,serêwedartişê vîlan… zaf dûrî nîyo….