Dayîke Remzîye Bayrama ke 23 serrî yo raşteyan de aqûbetê lajê xo pers kena, nika zî seba ke vengê torinê xo Azad Bayramo ke 1ê Adare ra nata grevê vêşanîye de yo bido eşnawitene, raşteyan de ya. Dayîke vana ‘bêxêra têkoşîn, cuya ma de çîyêk çin o’.

DÎCLE MUFTUOGLU / MA / AMED

Rayberê Şarê Kurdî Abdullah Ocalanî ser o tecrîdêko giran esto. Vera tecrîdî de kurdî û dostê kurdan çalakîyanê tewir bi tewiran virazenî. Parlamenter û Hemsereka KCDyî Leyla Guvene 196 rojî yo ke grevê vêşanîye de ya.

Nasir Yagiz 183 rojî yo ke Başûrê Kurdîstanî de grevê vêşanîye de yo. Heto bîn ra hepsîyê ke zîndanan de dest bi grev kerdbî, roja 158, Îmam Şîş û 14 çalakwanê Strasbourgî roja 157, Yûsûf Îba 131, Fadîle Toke 123, hepsîyan ra 2 grûbî zî çalakîya xo açarnabî rojeyê mergî. Reyna çalakîya grevê vêşanîye ya parlamenteranê HDPyî dewam kena.

Mehmet Şîrîn Bayram 1ê Teşrîna peyêna 1996î de amebi tepiştene û dima ra tira ti xebere nêameye girewtene. Dayîka ci Remzîye Bayrame bi serran seba ke aqûbetê lajê xo biperso, Parka Koşuyolu de beşdarê çalakîya Dayîkê Aştîye bîyêne.

Êdî seba tersayîşî ti sebeb çin o

Heto bîn ra 8 aşmî verê torinê Remzîye Bayrame Azad Bayram zî Êlih de yeno tepiştene û dima ra tewqîf beno. Azad Bayram 3 aşmî Zîndanê Êlihî de maneno û dima ra 5 aşmî verê sewqê Zîndanê Wanî beno. Azad Bayram 1ê Adare ra nata grevê vêşanîye de yo. Remzîye Bayrama ke heta nika seba lajê xo xover dayêne, nika zî seba torinê xo Parka Koşuyolu de cayê xo gêna.

Dayîke Bayrame vana ‘eke ez tîya ra bivejîya, ez do şêra parke û beşdarê çalakîye biba’ û wina domnena: “Se beno wa bibo, ma do raşteyan de bibî. Êdî seba tersayîşî ti sebeb çin o. Domanê ma şîyî, torinê ma şîyî… Dayîkî aqûbetê domananê xo pers kenî. Ez fam nêkena, seba çend dayîkan senî hende polîsî yenî?”

Cuya dayîke bi têkoşînan vîyarto

Dayîke Bayrama ke 62 serrî ya, 23 serrê emrê aye bi têkoşînî derbaz bîyî. Dayîke vana ‘cuya ma de bêxêra têkoşînî çîyêk çin o’ û wina dewam kerde: “Azad zîndan de çalakîye de yo, ez û dayîka ci zî ma teber de çalakîye de yî. Xora sewbîna derdêkê ma çin o. Ma bi xo zî tecrîdî hîs kenî. Ez wexto ke keyeyê xo ra vejîyena, dima ra polîsan vînena. Ez nêşênâ şêra cayêk, ma no zî tecrîd nîyo? Domananê kurdan tewqîf kenî, vînî kenî, ma no zî tecrîd nîyo? Parka ke ma tede çalakîye virazenî, padayo, ma no zî tecrîd nîyo?”