Avûkatanê Ocalanî ra Ebrû Gunaye derheqê tecrîdo ke Rayberê Şarê Kurdî Abdullah Ocalanî ser o yeno domnayene de va ‘tecrîd dewamê komplo yo’ û wina dewam kerde: “Ocalanî bi paradîgmaya xo heme hesabanê dagîrkeran veng vejeno. Ocalan kaye goreyê şaran awan keno.”
YASÎN KOBULAN / MA / STENBOL
Komploya Mîyanneteweyî ke 9ê teşrîna verêna 1998î de bi Sûrîye ra vejîyayîşê Rayberê Şarê Kurdî Abdullah Ocalanî dest pêkerde, emser serra 20. de ya. Babete ser o Parlamentera HDPyî ya Mêrdînî Ebrû Gunaye qisey kerde.
Gunaye dîyar kerde ke seba famkerdişê komplo ganî merdim bişênbo cewab bido persê ‘gelo çira komplo ameye viraştene?’ bido. Gunaye wina va: “Ocalan ê kesê ke Rojhelato Mîyanên de bi hawayo aktîf sîyaset kenî ra yo û Rojhelato Mîyanênî ser o hakim o. Paradîgma û felsefeya Ocalanî goreyê menfîetê dagîrkeran nêbî. Cok ra hetê hêzanê mîyanneteweyîyan ra Rojhelato Mîyanên ra ame vetene. Xora Ocalanî verê cû tesbîtê ‘seba ke mi Rojhelato Mîyanên de kayan xira kerdêne, ez ameya vetene’ kerdbi.”
Gunaye va ‘tecrîd zî dewamê komplo yo’ û wina domnaye: “Çimkî armancê komploye tena Ocalanî Rojhelato Mîyanên ra vetene nêbi, eynî wext awankerdişê kurdê xo bi. Prosesê tecrîdî heme kanalê ke mabênê Ocalan û kurdan de estbî hedef girewt û hewl dayî Ocalanî bi şar bidî vîrî kerdene. Komplo sey tecrîdê Îmrali dewam keno.”
Ocalan ewro zî kayanê î nan veng vejeno
Gunaye qala vindetişê Ocalanî kerde û wina va: “Ocalan komploye ra ver Rojhelato Mîyanên de kayanê dagîrkeran xira kerdêne, ewro zî bi paradîgmaya xo hesabanê înan xira keno. Birêz Ocalan hewl dano kurdê azade xelq bikero. Ewro Rojhelato Mîyanên de çîyê ke bitaybetî kantonanê Rojawanî de benî, nîşanê ma danî. Hêzê dagîrkerî zî nika hewl danî na kaya ke lehê şaran de ameya awan kerdene, xira bikerî. No şerêko îdeolojîk o. Hêzê mîyanneteweyî hewl danî kurdê xo awan bikerî. Felsefeya Ocalanî zî vera nêyî de vindeno.”
Ewropa zî bêveng mende
Gunaye qala tecrîd de rolê Ewropa zî kerde û wina va: “Dezgehê sey CPT, MHME û Konseyê Ewropa vera tecrîdê Îmrali de bêveng mendî. Xora tayê hêzî bi bêvengmendişî komplo de cayê xo girewtî. Eke merdim şertanê Îmrali ra biewnîyo, Guantanamo ra hîna xirabêr î. Orte de konsensusêk esto û qerarê MHME û CPTyî zî nê konsensusî ra qerfîyaye nîyî. Tesdîqkerdişê tecrîdî, yeno manaya tesdîqkerdişê komplo. Tîya de rolê Tirkîya tena gardîyanîye ya. Wexto ke ma ewro qala ewleyî, weşî û azadîya Ocalanî kenî, ma seba heme Rojhelatê Mîyanênî vanî. No zî ancax bi pêvînayîşan beno.”
Tesîrê Ocalanî dewam keno
Gunaye peynîya qiseykerdişê xo de wina va: “Ma 2013 de bi prosesê aştîye dî ke tesîrê Ocalanî Tirkîya û Rojhelato Mîyanên de çiqas zaf o. Awankerdişê prosesê aştîye xeylê zehmetin o. Ganî îradeyêka girde bêra nîşan dayene. Birêz Ocalan wayîrê îradeyêka winasî yo. Ma serra 99 û 2013 de bi hawayo baş dî. Yê ke tewr baş şer kenî, eşkenî bi hawayo baş aştîye bipawî. Senî ke pêvînayîşî vindetî, polîtîkaya şerî kewte dewre. Birêz Ocalanî va ‘eke prosesê şerî nêqedîyo, do derbekarî bikewî dewre’ û nê hetî kewtî dewre. Eke derbazê prosesê dîyalogî biameyêne kerdene, o wext hende merdimî nêmerdênê. Reyna ekonomîye hende xira nêbîyêne. Ancax bi wedarîyayîşê tecrîdî tezê Modernîteya Demokratîke yê Ocalanî keweno dewre.”