Her çiqas ke qetilbîyayîşê Mudirê Weşanê Pêroyî yê Rojnameyê Agosî Hrant Dînkî ser ro 10 serrî derbaz bîyî zî nobeda seba gêrayîşê edaletî hema zî dewam kena. Babete ser o avûkatanê Dînkî ra Hakan Bakircioglu, rojnameger Umît Kivanç û Mudirê Weşanê Pêroyî yê Nor Radyo Dîren Cevahîr Şene qisey kerdî.Avûkat Bakirciogluyî va ‘badê ke ma muracatê çend cayan kerd, qerarê cigêrayîşêko hîra yê cînayetê Dînkî ame girewtiş’ û wina domna: “Nê qerarî ra dima dest bi îfadegirewtişê wezîfedarê dewlete û kesê ke cînayet de ca girewtî ame kerdiş. Dima ra derheqê 27 wezîfedaranê dewlete de îdîaname amade bîye.”
Dozê neweyî abîy
Bakirciogluyî va ‘goreyê Serdozgerîya Stenbolî, roja qetilbîyayîşê Dînkî de Fermandarîya Cendirmeyan ra çend leşkerî zî cayê hedîseyî de estbîyî û nê kesan qatil Ogun Samastî taqîp kerdo’ û wina dewam kerd: “Nê zanayîşan ra dima ganî dozê neweyî bêrî akerdiş. Her çiqas ke doze 9 serran ra dima ameye akerdiş zî no çîyêko muhîm o. Ganî Serdozgerîya Komare ya Stenbolî çîyê ke no proses de ameyî cuyayîş, bişopno û goreyê ci îdîaname amade bikero. Ganî muracato ke ma seba mehkemekekerdişê Velî Kuçuk, Kemal Kerînçsîz, Oktay Yildirim û sewbîna kerdbî, bêro qebulkerdiş.”
Nobedarî qisey kerd
Umît Kivançî dîyar kerd ke ‘ma destpêk ra nata tim va ke no cînayet hetê organîzasyono ke mîyanê dewlete de yo ra ameyo kerdiş’ û wina va: “Hewl danî ke cînayetî bierzî ser tayê kesan. AKP zî tede, xeylê kes û hêzî mîyanê nêyî de estî. Nika wazenî têkilîya cînayetî Cematê Gulenî reyde ronî. Sankî verê cû Ergenekoncîyî qet nêbîyî û heme çî hetê FETOcîyan ra ameyo kerdiş, nîşan danî. Muxalefetî ra tayê kesî daxî nêwazenî cînayet roşn bibo. Rewşa Garo Paylanî orte de ya. Tirkîya de seba ermenîyan çîyêk nêbedilîyayo. Hîna zî çekuya ermenî sey lengî yeno dîyayîş û ma welatêko winasî de cuyenî.”
Wazenî se bikerî
Dîren Cevahîr Şene zî wina va: “Mehkemekerdişo ke 10 serrî yo dewam keno de hema zî berpirsîyaran hesab nêdayo. Çira îdarekarî nêvejîyenî mehkeme ver? Ma qatilanê rastikênan şinasnenî. Ganî îfadeyê heme îdarekaranê o wextî bêro girewtiş. Wazenî cînayetî tena FETOcîyan reyde sînordar bikerî û bi no hawa wazenî berpirsîyarîya cînayetî xo ser ra bierzî. AKP nêeşkeno bi vatişê ‘ma amey xapênayîş’ xo pak bikero. AKP ortaxê sucî yo.”
Heto bîn ra Serrgêra 10. yê qetilbîyayîşê Mudirê Weşanê Pêroyî yê Rojnameyê Agosî Hrant Dînk bi aktîvîte û çalakîyanê cîya yeno vîrardiş.
YASÎN KOBULAN / STENBOL / DÎHABER