Seba serbestîya Raverê Şarê Kurd Abdullah Ocalanî nûmayişê nobedî vila benê. Nûmayişanê vizêr de serrgerayina roşanê xoverdayîş ê 15“ê Tebax zî bimbarek bi. Badê xêlê cayan qezaya Mûş Gimgim de zî serva serbestîya Rayverê Şarê Kurd Abdullah Ocalanî nûmayişa ‘Nobeda Serbestîye’ destpa kerd.
Nûmayişa ke ver Şaredarîya Gimgim de bi tewrbîyena xêlê kesan destpa kerd de, panqarta “Derbeyan rê ravêrdîn çîno! Ne derbeya lejkerî, ne zî ya sivîl, demokrasî ra tewîz çîno” abîya. Hemserokê HDP yê qeza Mûzzafer Akkoyûn ke nûmayiş de qisey kerd hayr ant tecrîdê giran ê Rayverê Şarê Kurd Abdullah Ocalanî ser. Akkoyûnî aşkere kerd ke no tecrîd nîno qebûlkerden û va, seba xeber girotişî ganî desinde Heyetê Îmrali şiro û pêdiyayin virazo. Mûzzafer Akkoyûnî waştena wedarnayişê tecrîdî û serbestîya Ocalanî ard ser ziwan û veng da herkesî ke tekoşînê xo berzêr bikerê.
Badê damûstayîn nûmayişa nobed ke do her roj mavêna seatanê 15.00 û 17.00î de bîro viraşten destpa kerd. Heto bîn ra ‘Nobeda Serbestîye’ ke mehla Mûş Yeşîlce de destpa kerdbi roja 15. de ramena.
Çewligijî hay payra
Nûmayişa Çewlig roja 5. de pê coşekê girdî dewam kerd. Adresê nûmayişê vizêr nê perey mehla Bahçelîevler bî. Nûmayiş de zêdbiyayîşê ceniyan eleqe ûnt xo ser. Nobeda Serbestiyê de hemseroka HDP Zerrîn Berdibek qisey kerd û arde zûne ke ê bi qerarînê ke hetûn Ocalan ra xeber guretiş nûmayişê xo rê dewam kene. Nûmayişarê ke vera tecrîdî hêrsinî waşte ke berê Îmrali abîyo.
Erxanî û Farqîn ra vengdayiş
Nûmayişê nobed ke bi rayveriyê HDP, DBP û KJA dest kerd ci, Amed û qezayanê ci de zî ramenê. Qezaya Erxanî de hemşaredarê qeza Ramazan Kartalmiş, îdarekaranê DBP-HDP ya piya xelyek welatijan ca guret. Nûmayiş de waştenê serbestîya Ocalanî ardiya zûn û vaciya ke hetûn xeber guretiş ê kuçeyan ra nêveciyen. Hûnca qezaya Farqîn de zî her şûn de binatê seatê 19.30 û 22.00 de walatijî yenî pêser. Tîya de zî nûmayişkaran waştena pêdiyayinî pawitox û keyeyê Ocalanî ardî ser ziwan. Welatijan dazûnayene ke hetûn pênî guretiş çalakiyê înan dewam kena.
Edena zî destpa kerd
Yew nûmayişa bîn ya nobed zî qezaya Edena Seyhan de bi rayverîna KJA de destpa kerd. KJA çarçoveyê kampanyaya ‘Wayîr Rayver, erd û serbestiya xo bivecîye’ de Seyhan de startê nobedî da. Heto bîn ra Edena de çehar cayanê bînan de zî cnûmayişê nobedî ramenê. Qezaya Hatay Îskenderûn de zî ‘Nobeda Serbestîye’ roja 5. de ramena. Welatijê ke temsîlkarîya HDP de amey pêhet mesajê dewamkerdişê nûmayiş day. Roja 4. yê nûmayiş de roşanê vejînê 15ê Tebax zî ame bimbarek kerden. Nûmayişê ‘Nobeda Serbestîye’ ke Riha, Dîlok û Êlih de destpa kerdbî zî ramenê.
NAVENDÊ XEBERAN