Bi qerarê Wezaretê Karê Zereyî 19ê Tebaxe de şaredarîyê Amed, Wan û Mêrdînî ameybî xespkerdene û herinda hemşaredaran de qayûmî ameybî tayînkerdene. Vera xespbîyayîşê şaredarîyan û tayînbîyayîşê qayûman de çalakîyê Nobeta Demokrasî dewam kenî.
30 rojî yo ke sere de Amed, Wan û Mêrdîn û xeylê cayanê bînan de çalakîyê protestoyî yenî viraştene. Çalakgêran ra Hemserekê KAYYDERÎ Tûncay Gokçeyî dîyar kerd ke ê do bi bi seyan komeleyê ke binê banê înan de ca gênî, destek bidî çalakîyan.
Gokçeyî va ‘ma proseso ke esto ra eciz î’ û wina domna: “Ma hertim hewl da hetê demokrasî, aştî, azadî, heq û huqûqî de ca bigîrî. Ma hertim hetê mazlûm û bindestan de ca girewt. Xora coka ma ameyî tîya. Her hewte ma ra komeleyêk nobete de ca bigîro. Ma do tena Amed reyde sînordar nêmanî, Wan û Mêrdîn de zî destek bidî çalakîyan. Wezîfeyê rêxistinanê sîvîlan pawitişê rûmet û îradeya şarî yî. Tayînkerdişê qayûman ver herkes eciz o. Şar heta nika qet sere nêrona. Weçînayîşê Stenbolî de tesîrê komeleyan zaf bi. Ma do çalakîya nobete zî nê tesîrî nîşan bidî.”
MA / AMED