Her çiqas ke astengîyî bibî zî Nobeta Wijdan û Edaletî ke Parka Ekîn Cerene de hetê Partîya Demokratîke ya Şaran (HDP) ra dîyaybî destpêkerdiş, roja xo ya 4. de dewam kena. Babete ser o Endama MYKyî ya HDPyî Sevtap Akdage û Verfeka Meclîsê Cinîyan yê HDPyî Dîrayet Dîlan Taşdemîre qisey kerdî.
Wa bêro zanayîş ke şar do barîqatan birijno
Akdage qiseykerdişê xo de wina va: “Tirkîya bîya sey zîndano akerde. Wexto ke ma şonê teber, ma raştê astengîyanê îqtîdarî yenê û çapemenî yena astengkerdiş. Na rewşe xeylê zêde bîya û êdî merdim nêeşkeno ke vera nê hêrişan de bêveng bimano. Ma zilmê îqtîdarî reyde rî bi rî yî. HDP hewl dano ke bedilnayîşan bikero û cuyêka yewbînanî awan bikero. Cok ra ma dest bi nobete kerd. Ganî wayîr bêro vejîyayîş û piştî bidîyo nobeta xoverdayîşî. Her çiqas ke cayê nobete şenik bibo zî astengîyêka girde nobete ser de esta. Wa bêro zanayîş ke şar do barîqatan birijno.”
Huqûq bin destê îqtîdarî de yo
Taşdemîre zî qiseykerdişê xo de wina va: “Seba ke ma vera faşîzmî bigîrî, ma dest bi çalakîya nobete kerd. Ma seba pawitişê edalet, aştî û demokrasî nobete de yî. Her çiqas ke ameyîşê ma yê Parka Ekîn Cerene bêro astengkerdiş, reyna zî çalakîya ma roja 4. de dewam kena. Kesê ke wazenê beşdarê nobete bibî, yenê astengkerdiş. Wexto ke qala kurdan bibo rewşa OHALî kewena dewre. Huqûq kewto bin destê îqtîdarî. Meşa CHPyî de astengî nêvirazîyayî, la yê ma de virazîyenî. Se beno wa bibo nobeta ma ya 7 rojî do dewam bikera.”
ŞÛJIN/AMED