SAFÎYE ALAGAŞ / JINNEWS / AMED
Serdozgerîya Komare ya Amedî verê cû derheqê Keyeyê Destekî yê Perwerdeyî (EDEV) yê ke girêdayeyê Şaredarîya Kayapinarî de bî, tehqîqat daybî destpêkerdiş û na çarçewa de polîsan eştbî keyeyan ser û Beyaz Kaya û Dîlan Çîçeke tepiştbî. Kaya û Çîçeke dima ra serbest ameybî veradayîş, serdozgerîye zî îdîanameyê înan temam kerde.
Serdozgerîye derheqê Kaya û Çîçeke de bi îdîaya ‘endamê rêxistine bîyayene’ ra 5 serrî ra heta 10 serrî ceza waşte. Serdozgerîye EDEVî sey dezgehê ke girêdayeyê PKKyî girewte dest. Reyna îdîaname de notê pêvînayîşî yo ke Rayberê Şarê Kurdî Abdullah Ocalanî 10, 19 û 29ê êlula 2010î de avûkatanê xo reyde kerdo û qala perwerdeyê bi ziwanê dayîke kerdo zî ca girewto. Serdozgerîye vatişê Ocalanî suc hesibnayo û dîyar kerdo ke EDEV zî seba nêyî ameyo rêxistinkerdiş. Heto bîn ra îdîaname de ca dîyayo îfadeyê şahidanê nimiteyan yê bi nameyê ‘Kar’ û ‘Kadîfe’ û xeberê ke derheqê EDEVî de keyepelenê bînan de vejîyayî zî ameyî zêdekerdiş.
Dozgerî îdîaname de ca dayo vatişanê Rayberê Şarê Kurdî Abdullah Ocalanî û ameyo îdîakerdiş ke Ocalanî pêvînayîşî de qala perwerdeyo bi ziwanê dayîke kerdo û dozgerî zî vano no talîmat o.
Beyaz Kayaye wextê tepiştişî de îfadeyê xo de wina vato: “Hedefê awanbîyayîşê EDEVî seba perwerdedayîşê wendekaranê feqîran o. Sewbîna ti hedefê ci çin o. Ma seba ke endamê rojnameyê Ozgur Gundemî yî mîyanê xo de pere kom kerdo.”Perwerde dewlete rijneno
Reyna pêvînayîşê telefonî ke Kayaye bi mamostayanê EDEVî reyde kerdî zî suc hesibîyayî. Dozgerî 15 pêvînayîşê telefonî yê Kayaye sey ‘Kayey seba ke beşdarbîyayîş xurt bibo, veng dayo ê kesan’ girewto dest. Kayaye dîyar kerd ke ê kesî mamosta yî. Dozgerî îdîa kerdo ke EDEV seba ke musnayîşê îdeolojîyê rêxistine ameyo awankerdiş û rijnayîşê mektebanê bînan esas girewto.