2014 bî. Ez 7ê Temmuzî de şîbîya Başurê Kurdistanî. Wexto ke ez şîbîya Başurê Kurdistanî mi soz dabi hevalê xo yê rojnamerger. Mi vatibi ez qey (seba)sîteya Kurdistan 24’î, mi Kurdistan û mîyanê gerîla de çi dî, nusnena.Çunke a sîte ma çend hevalanê rojnameger awankerdibî, mi zî hem hetkarî da hem zî qey sîte nuştenê. Wexto ke ez şîya Başurê Kurdistan mi zî qey sîte her hefte yew nuşte amade kerdenê û şirawitenê.
O çaxî zî şerêk giran Başurê Kurdistan û Rojawanê Kurdistanî de bibi. Çeteyê DAÎŞ yê dewleta tirk hêrîşê hetê Kobanê, Ceza, Til Koçer înan kerdenê. DAÎŞ o çaxî Musil zî girewtibi. Musil ra dima Til Afer zî îşgal kerdibî. Dima ra xora 3ê Tebaxe 2014 hêrîşê Şengalî kerd. Herîşê berdenê ser Kerkûke zî. Ma zî sey rojnameger hem şîyê cayê gerîla hem zî şîyê hetê Kerkûk, Sêmalka, Zaxo û Dihok.
Ma hetê gerîla de zî şîyê zaf cayan. Wexto ke ma gêrenê mi cayê gerîla de Rojnameger hevala Şehîd Nûjiyan Erhan dî. Xora mi verê cû zî zaf nuşteyê Şehîd Nûjiyan Erhan wendibî. Nuşteyê Şehîd Nûjiyan zaf bi erjayî û bi bengînî bî. Qeleme aye sey qelemek romannuştox û şaîran bî. Qey aye mi waştenê Şehîd Nûjiyan zî Kurdistan 24 de binuso. Gerîla senî ciwîyeno û rewşa gerîla û Başurê Kurdistanê ser ma rê her heftê yew nuşte bişirawo. Mi Şehîd Nûjiyan ra qiseykerd. Ez û Amed Dîcle pîya bî. Peynîyê peynî de Şehîd Nûjiyan îqna bî. Qey Kurdistan 24 her hefte yew nuşte şirawitenê.
Şehîd Nujîyan dest bi neşteyan kerd. Ma zî sey yew qeflê rojnamegeran waşt ke bişîyerê Şengal. Şerê beyntarê gerîla û çeteyên DAÎŞ yê tirkan taqîp bikeri. Ma şîyê Semêlka, KDP nêverda ma şîyerê Rojawanê Kurdistan û Koyê Şengalî. Ma tepîya agêrayê. Çend rojî dima ra zî ma resayê Brukselî.
Ma ça ra zanenê ma dima ra Şehîd Nujîyan şina Şengal û uca de karê rojnamegerî kena. Ma ça ra zanenê pey guleyê KDP’ya neyar yena şehîd kerdiş. Ma ça ra zanenê Denîz dima ra a zî şina û şina.
Mesela tena nuşte nîya. Şehîd Nûjiyan ser mi de yew tesîr kerdibi. Zaf delal û xozayî bî. Tim û tim huyîyenê. Rîken bî. Zaf ziravî fikirkerdenê. O fikiryayîş nuşteyê aye de zî xo dane teberî. Yew sey Şehîd Nûjiyan reyna nînî na dinya. La qelema aye zî erdi de nîmanena. Tena yew biewno fotografo ke Şehîd Nujîyan kiştê Guldexwîn anto, bes o. Çi bar ho ser yewî, yew hol fam keno.