Nûrhayat Altûn rê 22.5 serr ceza wazîya

Serdozgerê Komara yê Dersim, derheqê Hemşaredara Dersim ya tepiştî Nurhayat Altun de îdîaname temam kerd û bi waştişê 22.5 serr ceza dawa akerd. 

Hemşaredara Dersim Altûn 16'ê Mijdara 2016’î de amê tepiştiş. Derheqê Altûn de îdîaname hadre bi. Dozgerî bi îdîayê “Rayverîya rêxistinî” derheqê Altun de 15 serran ra heta 22.5 serran cezayê girotxane waşt. Dawa do 3ê Tebaxe de, 1’în Mehkemeya Cezayê Giran ê Dersim de bîro dîyayîş. 

Ronişten 3ê Tebaxe de ya

Îdîanameyo ke ameyo hadrekerdiş netîceyê 22 îzahatê ke Altûn mavêna 2015 -2016î de Dersim de dayê ra virazîyayo.Reyna rîwalo ke Altûn tewrê meş, îzahat, merasîmê cenaze û ziyaretê mezelan bîya zey sûc ameyê vînayîş. Xebatê Altûn yê KCD zî zey xebatê rêxistinî yenê hesibnayîş. Hemşaredara Dersim Altun onca rîwalo ke tewrê Mihrîcana Çand û Hunerê ya Dersim bîya yena sûcdarkerdiş. Yewin roniştiş do 3ê Tebaxe de, 1'în Mahkemeya Cezayê Giran ê Dersim de bîro dîyayîş.   

 DERSIM