FERHAT ÇELÎK / MA / STENBOL
Çend rojî verê avûkatanê Rayberê Şarê Kurdî Abdullah Ocalanî muwekîlê xo reyde pêvînayîşêk viraştbî û netîceyê pêvînayîşî de çîyê ke amebî qiseykerdene, amebî parekerdene. Ocalanî pêvînayîş de hişyarîyê muhîmî kerdbî û bitaybetî bale antbi Rojawanê Kurdîstanî ser.
Pisporê Rojhelatê Mîyanênî, Nuştox Faîk Bulutî derheqê hişyarîyanê Ocalanî, Hêzê Demokratîke yê Sûrîye (QSD) û bazarîyê ke Sûrîye ser o benî de qisey kerdî. Bulutî da zanayene badê ke DAÎŞ ame qedênayene, êdî QSD hetê mîyanneteweyî de hîna zaf yeno şinasnayene.
Bulutî dewamê qiseykerdişê xo de wina va: “Sûrîye de xeylê cayî El Nusra û DAÎŞî ra ameyî pakkerdene. Sûrîye û Rûsya êdî nê cayan zî bombe kenî. Seba ke Tirkîya verê cû tayê sozî dabî û sozê bica nêardo, bombardûman yenî kerdene. Rûsya û Sûrîye seba ke Tirkîya teng de biverdî, bombe kenî. Çeteyê OSO ke nizdîyê Tirkîya yî, hêrişê Til Rifatî kenî, eke Til Rifat bigîrî, do hêrişê Helebî bikerî. Îran û Rûsya seba ke nêyî ra tersayî, kewtî têgêrayîşî mîyan. Amerîka zî wazena pê bêra û her di hetan zî destê xo de bitepişa.”
Bûlûtî qiseykerdişê xo de qala mesajê Ocalanî kerd û wina va: “Goreyê mi Ocalan hem mesaj dano QSD û hem zî Tirkîya rê pêşnîyazan keno. Ocalan hetanê kurdan ra vano ‘Şima zaf aver nêşêrê, mîyanê sînoranê xo de bimanê’. Yanî Ocalan bi dîplomasîyêka başe nizdîyê problemî beno û wazeno çareser bibo. Reyna dîyar keno ke tena çareserî sîleh nîyo. Ocalan heto bîn de zî Tirkîya ra vano ‘xo rê biaqil bibe, çimê ti kesî erdanê to de nîyo. Rojawan seba to tehdît nîyo, eke ti biwazê çareser bikerî, ewja de tehluke çin o’ û rayîrê çareserîye nîşan dano.”