Verfekê Tevgerê 78an û Endamê Merdimanê Zanayan Celalettîn Canî va ‘seba ke Tirkîya teng bîya, şî hetê Ocalanî’ û wina domna: “Ocalan vîneno ke komel de 2 hetî awan bîyî, cok ra wayîrê hesasîyetanê Tirkîya vejîyeno. No semed ra yo ke bale anceno muhîmîya pîya cuyayîşî ser.”
FERHAT ÇELÎK / MA / STENBOL
Rayberê Şarê Kurdî Abdullah Ocalan bi mabênkarîya avûkatanê xo deklarasyonêk ke 7 madeyan ra pê yeno, eşkera kerdbi. Verfekê Tevgerê 78an û Endamê Merdimanê Zanayan Celalettîn Canî derheqê deklarasyon û pêvînîyaşî de qisey kerd.
Canî da zanayene ke Ocalan kerdoxêko sîyasî yo bihêz o û wina va: “Grevê vêşanîyî bîyî sebebê pêvînayîşan. Vindetiş û kapasîteya ê kerdoxî dîyar î. Cok ra muxatab girîyayîşê Ocalanî seba qedênayîşê grevê vêşanîye nîyo, muxatab girewtişê Rayberê kurdan o ke Rojhelato Mîyanên de rayberî keno yo. Cok ra ti nêşênî ci reyde grevê vêşanîye ser o qisey bikerî.”
Canî bale ante tengbîyayîşê Tirkîya ser û wina va: “Seba ke Tirkîya xeylê babetan de teng bîya, şîye hetê Ocalanî. Rewşa ekonomîke ya Tirkîya baş nîya. Hetê sîyasetî de tengbîyayîşêk esto. Cok ra lazimîya Tirkîya bi tayê çîyan esta. Sebebê bingeyênî yê hukmatî Sûrîye yo. Grevê vêşanîye bîyî wesîle. Problemê Idlîbî dewam keno. Rûsya û Sûrîye dest bi operasyonan kerdî. Erdogan nêşêno operasyonan bivindarno. Eke çeteyî tasfîye bibî, dore yena Bab, Ezaz û Efrînî. Tirkîya wazena Sûrîye ra erd bigîra. Eke Tirkîya wazena biba wayîrê vatişî, ganî Kurdan reyde pê bikero. Lazimîya Erdoganî bi Kurdan esta.”
Bale anceno muhîmîya pîyacuyayîşî ser
Canî va ‘her ke şono têkilîyê hêzanê kurdan bi Sûrîye reyde benî normal’ û wina domna: “Çeteyî ewja de teng bîyî. Erdogan vîneno ke îxtîmalê tepîya ancîyayîşî esto. Ocalan heme çîyê ke Sûrîye de benî, vîneno. Cok ra hesasîyetê Tirkîya ser o vindeno. Ocalan wazeno ke komel de normalbîyayîşêk bibo. Çimkî zaf çîyê anormalî benî. Komel de etirîyayîşê cîddî estî. Na polîtîka êdî xitîmîyaya û hetê komelî ra nîna waştene. Ocalan vîneno ke komel de 2 hetî awan bîyî, cok ra wayîrê hesasîyetanê Tirkîya vejîyeno. No semed ra yo ke bale anceno muhîmîya pîya cuyayîşî ser.”
Ganî pêvînayîşî hertim bibî
Canî dîyar kerd ke îqtîdarî heta ewro polîtîkayê ke hetê nîmeyê şarî ra ameyênê rexnekerdêne, domnayî û wina va: “Badê ke 7ê Hezîrane de HDPyî se ra 13 reyî girewtî, îqtîdarî maseya çareserîye qelibnaye û na polîtîkayanê şaşan ra yewe ya. Raştîya xo de prosesê 2013 û 2015î zî hetê îqtîdarî ra baş nêame îdarekerdene. Ma îtîraz kerdêne, labelê nêameyêne vînayene. Eke çîyêko newe dest pêbikero, ganî pêvînayîşî hertim bêrî kerdene. Eke reyna masa de bêro ronîştene, kesê ke seba çareserîye xebetîyenî, bigîryî binê temînatî. Yanî ganî qanûnî bibo. Ewil gere rewşa Ocalanî bêro başkerdene. Çimkî hetanê tewr muhîman ra yew Ocalan o, cok ra ganî şertê ci bêrî başkerdene. Eke wina nêbo, o wext xora ti samîmî nîyî û kayan kay kenî. Ez bi xo çend reyan ameya tepiştene, gelo no wina beno?”