Nêrazîbîyayenê vera tecrîdo ke ser Rayverê Şarê Kurd Abdullah Ocalanî ferz beno, ramenê. Cinîyê ke metropolê Tirkîye Stenbol de ciwîyenê hêrsê xo damûsnay û aşkere kerdî ke heta ke tecrîd nêqedîyo, do kaos zî biramo. Cinîyan ardî ziwan ke heta ke Ocalan azad nêbo, haştî û serbestî zî nîno.
Rayverê Şarê Kurd Abdûllah Ocalan, 15'ê Sibata 1999’î ra na het hucreyêko yew kesî de, Girotxaneyê Ewlehîya Berz ê Tîpa F ya Îmrali de yeno tepiştiş.
Tewr peynî de birayê Ocalanî Mehmet Ocalan 11'ê Îlona 2016’î de şi Îmrali û bi birayê xo Ocalanî zîyaret kerd. 11'ê Îlona 2017’î ra na het Ocalanî ra xeber nîna girewten. Cinîyê ke Stenbol de ciwîyenê vera tecrîdî reaksîyon damûsnay û waştî ke ca de tecrîd bîro wedarnayen.
‘Kaos nêqedîyeno’
Cinîyan hayr antî rol û pozîsyonê Ocalanî ser û vistî vîrî ke Ocalan temînatê haştî yo. Cinîyan ardî ziwan ke eke Ocalan serbest bibo, do çareserî aver şiro û krîz çareser bibo. Cinîyan ra Elîf Zorlû aşkere kerd ke rîwalo ke tecrîdo ser Ocalanî giran bi, şer zî bi giran. Zorlû dîyar kerd ke Brêz Ocalanî şarê kurd ke amebi çinkerdiş hişyar kerd, bi rêxistin kerd. Zorlû vist vîrî ke zey şarê Kurd înan bi xeyra Ocalanî têkoşîn silasna û waştena serbestîya Ocalanî kerd.
Kampanyaya newî
bidê destpêkerdiş
Cinîya bi nameyê Melek Îlbars Tan zî ard ziwan ke şexsdê Ocalanî de şarê Kurd yeno tecrîdkerdiş û wina va: "Tecrîd do bi têkoşîna cinîyan bişikyo. Ma veng danê cinîyan ke seba serbestîya Ocalanî kampanyayêka newî bidê destpêkerdiş. Heta ke tecrîda ser Ocalanî biramo, do kaos zî biramo. Heta Ocalan azad nêbo kaos zî nêqedîyeno û heta kaos nêqedîyo zî kiştiş do biramo.”
Temsîlkarê yew şarî yo.
Hasîbe Kiliç zî waşt ke Rayverê Şarê Kurd Abdullah Ocalan bireso serbestîya xo û va, “Ocalan temsîlkarê yew şarî yo. Heta ke o azad nêbo, ti kes azad nêbeno. Ma wazenê wextekê lez de Ocalan azad bibo.”
Ayşe Candan zî waşt Ocalan bibo azad û wina va: Heta nika bi tenya yew hucre de yeno tepiştiş. No çîyêke dûştê mordemî yo. Eke Rayverê ma azad bibo, o wext haştî zî do bîro û gonî do vindero. Sebebo ke Tirkîye hendayî xirab a, tecrîd û tepiştişê Ocalanî yo. Ganî desince Ocalan azad bibo.”
DÎHABER/STENBOL