SADÎYE ESER / MA / STENBOL


Rayberê Şarê Kurd Abdullah Ocalan ke 19 serrî yo tecrîd de yo, tewr peynî 27ê Temmuza 2011î de avûkatanê xo reyde pêvînayîş kerdbî. O pêvînayîş de avûkate Asya Ulkere zî estbî. Avûkate Asya Ulkere reya sifteyîne serra 2001î de dest bi pêvînayîşan kena. 

Babete ser o Asya Ulkere qisey kerde û qiseykerdişê xo de qala muhtewaya pêvînayîşan kerde. Ulkere va ‘wexto ke 15ê Sibata 1999î de teslîmê Tirkîya bî, o wext ez zaf tesîr bîya û mi qerar girewt ke ez biba avûkat’ û wina dewam kerde: “Mi dîyayîşê Ocalanî yê zîndan de ra zaf tesîr bîya. Seke yew merdimê mi tewqîf bibo. Dima ra her ke ma şîyî û ameyî, ma nê atmosferê hîsinî derbaz kerd. Ma ey ra hêz girewt, ma musayî û ewnîyayîşê ma bedilîya.” 

 Ulkere dewamê qiseykerdişê xo de wina va: “Ma şîyayîş û ameyîşan de xeylê zehmetîyan reyde têrî mendênê. Labelê wexto ke ma Ocalanî dîyênê, ma heme çîyî xo vîra kerdênê. Ocalanî hertim payra ameyêne ma vera û vatêne ‘şima xêr ameyî’. Xora pêvînayîşo sifteyîn de no nizdîbîyayîş mi ser o zaf tesîr kerdbî. Edetê Ocalanî bî; hertim ewil persê name, peyname, bajar û baroyanê ma kerdênê. Mi zî pêvînayîşo sifteyîn de cewab daybî. Ez zaf heyecanin bîya. Nika cewabê ke mi daybî nînî mi vîr. Dima ra embazan mi ra vatbî ‘Birêz Ocalanî nameyê to zaf ecibnayo’. Mi çapemenîye de zaf dîybî, labelê rî bi rî mi qet ey nêdîbî. Ez dîyayîşê ci ra zaf tesîr bîbîya. Çimkî o rayberê şarêkî bi.”


Hertim qala tarîxê cinîye kerdêne

Ulkere dîyar kerde ke hişê Ocalanî zaf pêt bî û wina domnaye: “Eke pêvînayîş de avûkata cinîye bibîyêne, Ocalanî babeta cinîye eştêne orte û qala îdeolojîyê rizgarîya cinîye kerdêne. Ocalanî bi hawayo cîddî nizdîyê na babete bîyêne. Pêvînayîşan de hertim qala tarîxê cinîye kerdêne û ma rexne kerdêne. Ma ra hertim persê ‘şima tarîxê cinîye zanenî?’ kerdêne.  Birêz Ocalanî temsîlîyeto zeypê ser o vindetêne. Weçînayîşan de hertim babeta kotaya cinîye ardêne rojeve. Qiseykerdişanê xo de qala taxima cinîyan kerdêne û vatêne ‘ganî akademîya cinîyan bibo’. Pêvînayîşî bingeyê Jineolojîyî awan kerdî.” 


Wextê AKPyî de tecrîd dest pêkerd

Ulkere va ‘2011 ra nata ma nêşênî Ocalanî reyde pêvînayîş bikerî’ û wina qedênaye: “Wexto ke AKP ame îqtîdar ra nata Ocalanî ser de tecrîd dest pêkerd. 2011 ra ver ma ge-ge Birêz Ocalanî reyde pêvînayîş kerdêne. Hetta ge-gane ma rojanê şemeyan zî pêvînayîş kerdêne. Yanî kamcîn wext dewlete biwaştêne, ma pêvînayîş kerdêne. Goreyê qanûnanê Komara Tirkîya heqê heme hepsîyan estî. Labelê nê qanûnî nêkewenî dewre. Eke tecrîd wedarîyo, do proses hîna nerm bibo. O wext do rayîrê çareserîya problemê kurdî zî biabo. Do ekonomîye ser o zî tesîr bikero. Çimkî heme neheqîyî bi tecrîd dest pêkerdî.”