KADAR ÎBRAHÎM / ANHA / QAMIŞLO
Dewleta tirkî Rayberê Şarê Kurdî ser o tecrîdêko giran domnena û no tecrîd donemanê peyênan de hîna giranêr bîyo. Ocalan 7 serrî yo nêşêno bi avûkatanê xo û 2 serrî yo zî nêşêno keyeyê xo reyde pêvînayîşan bikero.
Suryanîyê tirbêspiyîjî babete ser o qisey kerdî û vera tecrîdî de reaksîyon nîşan dayî û şermizar kerdî. Suryanîyan dîyar kerd ke Ocalanî rayîrê azadîye yê şaran roşn kerdo. Suryanîyan ra Corc Josef Josefî va ‘ma suryanîyî raybero ke azadîya şaran wazeno û yeno esîr girewtene şermizar kenî’ û wina domna: “Seba ke fikrê Rayber Ocalanî çinî bikerî, serra 1999î de komployêka mîyanneteweyî viraştî û dewleta tirkî bi na komploye Ocalanî hepis kerde.”
Josefî qiseykerdişê xo wina da domnayene: “Dewleta Osmanî û dewleta tirkî vera şarê ke azadîye waştîye de qetlîyamî viraştî. Suryanîyî zî raştê eynî qetlîyaman ameyî. Nê qetlîyamî Efrîn de zî dewam kenî. Dewleta tirkî wazena kultur û nasnameyê kurdan çinî bikera. Cok ra hewl dana fikranê Ocalanî îzole bikera. Şarê Vakurê Sûrîye felsefeya Ocalanî esas gênî. Ma ewro saya fikrê Ocalanî de pîya cuyenî.”
Ocalan seba bindestan têkoşîn dano
Suryanîyan ra Suat Mîlkoye zî wina va: “Ma suryanîyî her keso ke nîjadperestîye ra durî û seba azadîya herkesî têkoşîn danî silam kenî. Rayber Ocalan zî nînan ra yo. O seba şarê xo û bindestan têkoşîn dano. Tecrîdo ke dewleta tirkî vera Ocalanî de bikar ana, sucê merdimîye yo. Her hepsî ganî avûkat, keye û merdimanê xo reyde pêvînayîşan bikero û kontrolê doktorî ra derbaz bibo. Labelê dewleta tirkî Ocalanî nê heqanê ci ra mehrûm verdana.”