FERHAT ÇELÎK / MA / STENBOL
Netîceyê xoverdayîşê grevê vêşanîye û çalakîyanê bînan de 2 û 22ê Gulane de avûkatanê Rayberê Şarê Kurdî Abdullah Ocalanî muwekkîlê xo reyde 2 pêvînayîşî kerdî. Serekê Pêroyî yê Weqfa Aştîye Hakan Tahmazî pêvînayîşan erjna û mesajê muhîmî dayî.
Tahmazî da zanayene ke qerarê qedexekerdişê pêvînayîşan 2011 de wextê operasyonanê KCKyî de ame girewtene û wina va: “No zî bi hedefnîşandayîşê Erdoganî bi. Ma kerdişanê Îmrali ra fam kenî ke Tirkîya de kamcîn wext şîdet zêde yan zî kêmî beno. Çimkî Tirkîya Îmrali de huqûqêko taybet domneno. 8 serran ra dima pêvînayîş ame kerdene û ez bawer kena ke êdî rolê Ocalanî ameyo famkerdene.”
Tahmazî dîyar kerd ke goreyê ci seba ke Tirkîya teber û zere de teng bîya, reyna şîya berê Îmrali ver û wina va: “No çîyêko xirab nîyo. Ganî bêro famkerdene. Xora Tevgerê Sîyasî yê Kurdan seba çareserîye Ocalanî nîşan dano. Prosesê Oslo de dewlete waştbi ke Ocalanî dewre ra bivejo, labelê o wext Hemserekê DTPyî Ahmet Turkî vatbi ‘muxatabê problemê kurdan Îmrali de yo’. Ez bawer kena ke Tirkîya de qîmetê Ocalanî nîno famkerdene. Labelê goreyê mi dewlete nêyî baş fam kerdo. Çimkî pêvînayîşanê Oslo de musteşarêk Ocalan ra vano ‘Serek, ti şahid î nê, bawerîya ma bi samîmîyetê to esta’. Cok ra her ke teng benî, şonî Ocalan. Werekna muxalîfî zî persê ‘gelo ma se bikerî?’ bikerdêne. Yanî herinda ke etirîyayîşan zêde bikerî, wa hêvîye pîl bikerî.”
Herkes şerî ser o sîyaset keno
Tahmazî bale ant vindetişê Ocalanî ser û wina va: “Ocalanî reyna zî seba çareserîye dîyalogan nîşan da. No zaf muhîm o. Wexto ke ma Meclîs ra ewnîyenî, ti kes qala dîyalogan nêkeno. Herkes şerî ser o sîyaset keno. Ocalanî bi mesajê xo yo peyên şansêko bîn da şaranê Tirkîya. Ocalan bi nê metnî hem veng dano AKP û hem zî veng dano muxalefetî û vano; ma hîna zî eşkenî bi dîyalogan çareser bikerî.”