Biyayiş taxa Sihenk de, 100 metre dûrê Lojmanê Polîsan de qewimî. Wesayîta parlamenter Onlu ke, bi hermeta xo û şêwirmendê xo ziyaretê jew keye ra ageyra hetê polîsanê hereketê taybet û TEM vinderniya. Polîsan tifing açarnay hetê Onlu û ey tehdît kerdî. Onlu vist vîrî ke wexto ke şoforê ci ame înan bicîro hetê polîsan vinderniya û qontrolê GBT ame kerdiş. Onlu da zonayen ke, wextê ageyrayiş de eynî ca de wesayîta înan onca vinderniya.
Provakasyon o
Alîcan Onlu aşkere kerd ke, rixmo ke ey polîsan ra vato ‘Ez wekîl a’ polîsan tifing dergê ci kerdî û heqaretê ey kerdî. Ser na biyayiş Onlu telefonê walitî kerd la, cewab nêgirot. Badê biyayiş, sermiyanê emniyet şî cayê biyayiş û ewja ra tayî polîsan dûr vistî û vatî ke fahmkerdişekê şaş biyo. Parlamenter Onlu ke vizêr telefonê Midûrê Emniyetî kerd cewabekê balkêş girot. Mudirî vato ‘ma jû sazgeha zaf muhîm ra jew îxbar giroto ke wesayît de cenaze estê.
Onlu ard zon ke no jew provakasyon o û niya va: “Rixmo ke veriya 10 deqeyî wesayît vindernay û niyadayê. No aşkere yo ke îxbar kata ra ameyo? Çima veriya coy mudaxale nêkerdî. Senî ke çapemenî amê polîsê ke tifing derg kerdî werte ra vindî bî. Çima zabit nêgirewtî. Ma no dirûm çend reynî walî û emniyetî rê vato, la teva nêvurniya.
Çeteyê girêdayê seray
Alîcan Onlu da zonayen ke polîsê ke tifing dergê ci kerdî, ver çimanê sermiyananê emniyetî de kî heqaretanê xo dewam kerdî û niya va: “Sermiyanê emniyet vano ‘şaşî bî’, o bîn vano ‘ez çiwext biwaza vindarnena.’ Raştî kî çeteyê girêdayê seray (qesr) û yê girêdayê emniyetî estê? Ma walî ra pers kenê. Şima valiyê çeteyê ke tifing kenê derg, heqaret kenê, bi kêfê xo nejdî benê yê?”
Onlu va, eke teberê înisiyatîfê walitî quwetê bînî estê se, aşkere bikerê û da zonayen ke, o do derheqê na biyayiş de gerreyê sûcî bikero û babed bikirêşo rojdemê meclîsî. Parlamenter Onlu da zonayen ke, eke neyra tepya çiyê bîro sereyê ey, mesûlê ci midûrê emniyet û walî yo.
DÎHA/DERSIM